fbpx
主頁, 動漫資訊, 潮玩新聞 — 13/05/2021 at 5:15 pm

《王小龍傳貳》玉兒扮媚娘安撫王伏虎?魔鬼黨佐治死咬王小龍把鬼咩!

by

不棄書,以包容之心真金白銀繼續撐《王小龍傳貳》,睇到今期第7期,我終於a little bit頂唔順劇情了。一,王伏虎俾藥王洗腦,繼而上演父子相殘一幕,解決方法唔係避開Or打殘Or綁起Or扑暈佢,而係靠玉兒「活用心理學及戲劇經驗,全力揣摩,再現一個幾可亂真的媚娘」嘅類似催眠式行為藝術,再加扮媚娘講嘢說出「伏虎,這不是你的錯……相信我,我有辦法幫到你的。」之類嘅老土深情對白,雙重夾擊試圖令王伏虎回復冷靜。先唔講玉兒原來咁得閒可以讀書進修兼咁有演戲細胞,家陣髮色唔似服飾唔似連粒假癦都無黐上面,如果咁都可以成功安撫到王伏虎的話,咁藥王啲洗腦藥咪流過劉華?二,魔鬼黨之所以介入杜拜一役,全因王小龍先前打傷保羅伯爵,間接連累保羅伯爵俾白蓮四魔虐待、俾大寶太監性侵,喂,話晒冤有頭倩有主喎,加上王小龍都親口解釋咗:「我不知道,保羅後來出了甚麼狀況……但當時我有手下留情。」講得如此清清楚楚,點解阿教父佐治係要死咬住王小龍唔放,而唔簡單直接地覆灼白蓮教呢?經編劇們精心鋪排,家陣魔鬼黨已經好比《古惑仔》社團洪興咁義氣行先,既然咁講義氣,點解唔第一時間班馬直踩韓國搵大寶報仇呢?呢個位我都睇唔明。

真心問,玉兒同媚娘,究竟有邊忽似?

 

雖然玉兒扮媚娘呢條橋膠膠哋,但慶幸,編劇們總算記得媚娘早早已經死咗。

 

依家先知,玉兒原來咁高學歷、咁有演戲細胞。

 

如果講兩句就KO到王伏虎,咁藥王啲洗腦藥都好流。

 

王伏虎唔清醒,老竇打仔,仲要一次過打兩個仔。

 

佐治好似好勁咁,但頭腦太簡單。

 

「恕我不講道理」,因為劇情真係無乜道理。

 

王小龍心諗:「你追住我嚟殺把L咩?」