fbpx
主頁 — 16/03/2013 at 9:17 am

16/3一週碟報價:步姐日版個唱開$610 貨少要早買

by

 

今個星期日韓影碟掛帥, 港產片完全冇影, 老碟迷相信要忍手到月尾喇! 裏面必買係浜崎步隻《ayumi hamasaki ARENA TOUR 2012 A: HOTEL Love songs》,呢隻碟係步姐出道15週年興祝重頭作, 據知喺日本8號派街時, 發行首日就獲得權威Oricon日本公信榜嘅DVD音樂、DVD綜合、藍光綜合三部門冠軍! 再講吖! 179分鐘演唱會加12分鐘特別收錄, 都要用到BD雙層碟片! 你話聲畫會去得幾盡先!? 再講, 日本人拍Live演唱會一直都用最靚嘅機, 成件事加埋完全冇得輸, 碟價$610! 貴嗎? 對唔住, 原價都要上7,000日圓, 唔係紙水低咗, 呢批日本版BD絕對唔會係呢個價, 絕對早買有着數, 而且貨量好一般, 步姐迷小心為上!

鍾意炸爆機嘅有《追擊赤色風暴》, 打打殺殺, 槍戰連場, 打到飛天冇問題, 動作片碟迷買啦唔使諗; 不過我個人就買咗隻《初戀築跡》, 佢話係韓國史上最賣座純愛電影, 你覺得我真係咁純情嗎!? 對唔住! 我係俾個封面引咗去買, 再睇埋封底, 韓佳人飾學生時代女主角書妍, 眼大大嘅裴秀智飾大個後嘅裴妍, 純情Look同戰鬥Look嘅女主角都係我杯茶, 我認我膚淺庸俗, 不過韓式愛情片老婆睇得開心, 我又睇得暢快, 你話係咪好妥先!

卡通BD都好強, 有《魔女宅急便》同《歲月的童話》, 有中文字幕, 又有日語、粵語配音, 看門口、留嚟儲都冇得走雞啦! 留意下星期會出《無敵破壞王》,哩! 好多經典遊戲機人物齊齊玩再培訓、再教育嗰套呢! 今個星期提早預訂, 到時就多送你一幅300塊砌圖, 心嗰句, 設計畫面一般般, 不過如果諗住買, 冇理由唔要蝕桌囉! 聽講下星期仲有隻《五星大聯盟》, 鍾意睇卡通嘅小朋友實開心死!

臨近月尾、復活節前一個星期, 係港產片世界, 《12生肖》、《百星酒店》、《2013我愛HK: 恭囍發財》都會係同一個星期出晒, 撐港產片嘅要留定彈葯!

 

DVD Pro(2332 6326)
地址: 旺角奶路臣街 6E德發商場地庫B4舖
營業時間 : 1:00pm-10:00pm(公眾假期照常)