fbpx
主頁, 動漫資訊, 潮玩新聞 — 20/04/2021 at 4:15 pm

《新著龍虎門》夠膽整死蚩尤? 出「大風暴」誤傷自己咁都得?

by

睇完今期第1093期《新著龍虎門》係幾震驚嘅,雖則家陣蚩尤不及《舊著龍虎門》般霸氣縱橫,但好歹都係個受歡迎一線角色,真係夠膽整死佢?睇個勢,似乎係,唔只見下期封面預告畫到蚩尤斷手,仲喺《王小龍傳貳》賣行廣告話「無窮戰意有盡時,戰神蚩尤征途終局」,兼寫明「1093‧1094‧1095戰神永逝不復返!」實牙實齒講到蚩尤得番兩期命咁款。苟如是,我會Sad。其實唔只Sad,仲覺得劇情好無厘頭。無厘頭在一,太弱化蚩尤,我諗喺九成九港漫迷心目中,喺單挑情況下,蚩尤就算贏唔到老天尊都至少同Grade可以打個平手,家陣老天尊剛剛屍變復活,憑幾期前連企都未企得穩嘅殘軀就可以打死蚩尤?會唔會兒戲咗啲?二,以書中武值觀推論,以蚩尤呢類超級高手隨隨便便篤吓手指就可以打爛一部車、求求其其揮吓拳頭揼地就可以搞到天崩地裂計,居然會俾一個爛鬼船錨割斷手臂?有無搞錯呀大佬;三,最Un頂able,係蚩尤出招「大風暴」,居然會俾反捲番向自己嘅半截船頭「重重一插」,繼而「頂住背門阻住自己退路」?大佬呀,唔知大家點睇,我就不嬲覺得「大風暴」同「雷霆擊鼓」同屬絕招級數,出絕招會咁「唔小心」傷害番自己嘅咩?咁石黑龍出絕招「鬼哭神號」會唔會唔小心俾自己支雙節棍扑番自己?老祖宗玩「御劍飛行」會唔會唔小心俾把劍篤親自己?白仇用萬毒心經會唔會唔小心毒死番自己?咪玩啦大佬,其實我只望有符合邏輯嘅劇情啫,真係咁難?

真係咁堅?夠膽整死蚩尤?

 

咁樣斷手,我覺得唔多合情理。

 

喺我心目中,「大風暴」係蚩尤絕招之一來的。

 

出招「大風暴」,居然會搞到俾一截船頭打番中自己,我完全黑人問號。

 

下期封面幾靚,甚Like。