fbpx
PS Vita, PS3, 主頁, 專題熱話, 遊戲新聞 — 14/03/2013 at 11:42 pm

最速試玩片《Gundam Breaker》甩頭甩手 執番再揪 以下犯上打高達

by

Bandai喺6月27日推出嘅PS3/PS Vita動作遊戲《Gundam Breaker》今日月體驗版登陸PSN ,連香港PSN都有,唔駛去日本。今次好有新意嘅係玩家操控嘅機動戰士全部都係模型嚟 ,斬甩手手腳腳甚至個頭都可以執番再打過,而且支援連線協力對戰,令人興趣大增。所以GameoverHK即時下載嚟玩,拍埋片俾大家睇,如果今晚唔開機下載,又或者懶得裝懶得試嘅,都可以睇吓呢條20分鐘試玩片,不過筆者都係第一次玩就錄影,打得七七哋,重覆犯咗好多人類會犯嘅錯誤,有怪莫怪。

基本上,呢隻遊戲玩落感覺唔差,操作簡單,甚至有啲過份簡單,可能因為開頭玩未強化得太多,所以招式唔多,兩個攻擊掣,儲滿能源按住R1按攻擊就可以出EX絕招,仲有一個掣係火神炮,X掣就係Dash同跳躍,L1擋格,左ANALOG就轉視點同轉鎖定目標,十字掣就用回復等道具……

第一個任務打到最尾有驚喜,就係打RX-78!吉姆以下犯上打高達,嘩俾雷劈o架!完咗第一個任務就到重點—改裝機體,可以用上一任務執番嚟嘅配件裝上吉姆身上,我就加咗大魔個裝甲,再嚟綠渣對手臂同高達個噴射器……之後攻擊力同防守力會有升有降,仲會有新招,之後搞咗一輪,頂,原來揀完入務要行番去機體前面出擊,等我以為得一個任務玩完……之後再出場,今次敵人強咗,一個唔小心俾人腰斬,腰斬完冇得起身執番啲手腳,捱揪到爆炸……暫時玩到呢度都係打到啲同比例嘅敵人,而正式遊戲推出時係會對唔同比例,即係HG對MG呀,有大有細,應該會更好玩!

好啦!睇完都未夠喉,就開機下載自己玩喇!「o依Ki媽SSSSSS!」

官方網站
http://pgdp.channel.or.jp/

Tags