fbpx
PS Vita, 主頁, 遊戲新聞 — 16/04/2012 at 3:43 pm

硬抄Draw Something PS Vita玩影相估圖兼叫床

by

好嘢難免俾人抄,不過抄得快再加強內容,都令人有可以一玩嘅衝動。PlayStation®Vita喺本月19日會有新應用程式登陸香港PS Store,今次有個叫「Paint Park」嘅繪畫影相遊戲,可以連線6人一齊玩;仲有一個就係「Wake-up Club」,同其他差唔多時間起身嘅玩家連線玩互叫,玩完個人都應該精神晒,好實用呀!

「Paint Park」就係玩出字估圖或出圖估字嘅game,即係好似draw something,不過佢就加埋影相元素,可以利用唔同顏色嘅虛擬畫筆畫畫之餘,仲可以用PS Vita正面或背面嘅相機影相再喺上面畫圖,叫做有啲新意。而講到最吸引,就係可以用Ad Hoc模式連線,最多6個人參加繪畫或攝影比賽,同時間互動。

「Wake-up Club」係一款俾一班「起床時間相同嘅玩家互相催促起床」嘅鬧鐘應用程式。只要設定鬧鐘時間,就能透過網絡同其他設定咗相同起床時間嘅人結成同盟。之後與同盟其他成員進行「起床」、「叫別人起床」嘅簡單聯動互相叫床。另外,應用程式仲有可於線上使用嘅計時同簡單鬧鐘功能,就算用緊其他應用程式,鬧鐘功能都可以喺背景運作,唔怕掛住打機而遲到。最後,呢個應用程式亦具備時鐘功能,可以喺多個時鐘設計中揀選喜愛嘅設計。

最後最後,喺4月24日,支援語音通訊嘅Skype亦會登陸PS Store,準時下載啦!