fbpx
主頁, 動漫資訊, 潮玩新聞 — 14/04/2021 at 3:15 pm

邱瑞新《火武耀揚》小Bug 雷公面相走樣跌Watt

by

嗱,瑞新唔好嬲嬲豬呀,有批評先有進步,今期第1121期《火武耀揚》有少少頂唔順呀喂。第14頁,智慧手下戰二虎,明明二虎染藍色頭髮,但阿手下居然話:「扑死你條金毛西。」是藍非金,植錯字定分錯色?And,之後有旁白云「一輪亂刀,對方竟淡淡然──睇定嚟食!」喂?畫面所見,明明阿手下揸嘅係鐵棍或水喉通物體,又何來快刀呢?呢啲小小小Bug,希望以後可免則免喇。另外,今期智慧、獒犬有幾格面相都幾……走樣吓,要不三尖八角,要不圓過圓規,要不歪口歪面,尤其雷公嗰格大頭……實在都幾驚嚇吓,封面阿愛嗰兩執頭髮起晒角又唔知想點咁……總之就要多多改善吓喇。撐你呀,瑞新,加油。

唔明阿愛兩執頭髮,點解會畫到起晒角。

 

二虎係藍毛,唔係金毛;手下揸嘅係棍,並唔係刀。

 

呢一格雷公嚴重走樣,我睇到O嘴。

 

呢格獒犬,畫到有啲三尖八角。

 

呢一格智慧畫到一啲都唔似有智慧,得罪講,似智障就真。