fbpx
編輯Blog — 10/03/2013 at 11:26 pm

[編輯Blog]爆炸哥:有啲嘢,想佢完又唔捨得完。

by

打機嘅目的係咩?嘆隻Game?當然係,但最終目標都係爆機。唔知你哋有冇試過,如果遇到一隻好好玩嘅遊戲,例如曾幾何時我玩PS隻《Metal Gear Solid》咁,打到最後,真係唔捨得佢完,但最後都係唯有打低Liquid……今日買咗《Gantz》第35期,我有啲感概。

有好多事物會令人諗起以前嘅事。第一次接觸《Gantz》,當時嘅我啱啱入行冇耐,喺某雜誌工作,係一個做漫畫版嘅同事帶番嚟公司,我唔覺意攞咗嚟睇。當時市面兩大年輕人雜誌都仲有漫畫專題,每星期都有兩三版,講吓港畫、日畫有咩新料,做吓港漫漫畫家訪問咁,我哋仲會去各大出版社攞漫畫返公司做介紹,順便益同事睇免費漫畫。

好耐,真係追咗好耐。其實我有睇連載,但係每期都會俾錢買,算係對得住作者。嚟到就快完,估唔到個結局就係咁?我一方面覺得佢好應該快啲完咗佢,另一方面又希望佢會有一個出人意表啲嘅結局,我諗過多三兩個月,應該有定案。到時,又係一個記念,我睇《Gantz》最後一期嘅時候,做緊GameoverHK,好忙,忙到癲。下次回想呢個時候,會係幾時?《Gantz》出續作?作者嘅新作?