fbpx
編輯Blog — 10/03/2013 at 10:44 pm

【編輯Blog】Reika:《我們可是看板貓,喵》 日版忌廉哥晒冷

by

鍾意宅文化,應該都聽過「看板娘」,以特定打扮為餐廳、商店「看舖」嘅美少女;「看板貓」,即係看舖貓,但未必有特定服裝,而且絕大部份時間,貓貓都會擅離職守,自由自在遊盪,甚至覺覺豬。簡單講,看板貓即係香港嘅忌廉哥。呢本《我們可是看板貓,喵》,即係日本版忌廉哥合集,亦係近期我好鍾意嘅一本貓書。

 

 

《我們可是看板貓,喵》翻譯自日本作者梅津有希子作品,收錄東京不同店舖看板貓。有理髮店、咖啡店等,名種貓少,大部份貓由店主收養或者係俗稱嘅「自來貓」。書內每隻貓貓佔2-4頁篇幅,圖多字少,最重要係相靚,排版精美,貓得意,同埋好有heart。

 

 

其實,我一度想買香港忌廉哥本圖文集,因為我覺得忌廉哥肥肥哋串串哋好得意,不過唔好怪我老實,拎起書揭咗兩頁後,我都係放返低,因為書嘅排版、印刷以至相片,都難以說服我比錢買。最後,我都係選擇繼續上facebook睇幾位OL生鬼為忌廉哥寫嘅定期更新。sorry呀忌廉哥。

 

facebook: 尖東忌廉哥