PS3, 主頁, 專題熱話, 遊戲新聞 — 11/03/2013 at 11:04 am

遊戲到手《God of War: Ascension》開機新片大場面 鎖鏈勾怪 血腥依然

by

今個星期偷跑潮,呢隻PS3《God of War: Ascension》本來星期二(12日)先出,但歐美版偷完,就輪到行版跑,所以我哋都第一時間出片先!今次遊戲最創新部份可以話係多人模式,Kali遲少少會出試玩片。我就對多人模式感覺麻麻,丁屎咁細粒人仔劈嚟劈去喺個地圖度走嚟走去,有啲地圖仲好細……好,開機!包裝上面寫明有6月出嘅《The Last of Us》體驗版喎,雖然可能同我喺台北遊戲展試玩嗰段一樣,不過都好興奮好想玩,因為當時未玩得晒……

好,開機睇完OP,咦?試玩按O掣?即時入去!Load緊喇!右下角仲有細細個標題閃閃吓,正呀喂!點知畫面一閃,倒數?Load咗咁耐你同我喺度倒數?Ellie你楚楚可憐咁望住我做咩?倒數日期係拍片日起計83日,即係5月31日先有得玩,早遊戲推出兩星期,唓……好啦,玩番GOW單人模式,今次遊戲開頭,戰神克雷多斯(Kratos)俾人綁住,之後就係玩吓QTA咁,再嚟打吓卒仔熱吓身後,就好似第3集開頭咁,打超巨型中Boss!

輕重攻擊,R1可以用鎖鏈勾住敵人,L1就擋掣,升咗級可以反彈敵人攻擊,同上一集唔算好大分別,但係,嗚!啲畫面真係靚得交關!打完第一個大佬之後,超超巨型嘅敵人直情成個建築拎起手拍打,戰神丁屎咁細又要跳嚟跳去打卒仔,超壯觀,但我冇時間睇靚景……今次開機拍唔到好長,自己本身都未開始煲,未係玩到好遠,不過未推出之前試玩會時就試過戰神今集有修復環境嘅技能,有啲位你要修復晒先去到,有啲位你要回復一半先上到去,呢個位令解謎原素增加,亦為今集故事模式帶嚟更大新鮮感。

雖然話今次單人模式風格同操控冇乜大變,畫面都係咁靚,攻擊完結技一樣都係咁血腥!但其實一隻遊戲好玩嘅話,故事背景時間唔同都已經好夠,反而更有續作感覺。總括一句,如果你上集玩得過癮,今集一樣會煲得爽!