編輯Blog — 04/03/2013 at 11:33 pm

[編輯Blog]錢無義:開箱後的遊戲……

by

做咗GameoverHK之後,拍咗好多開箱片,普通版遊戲多數係廠商贊助嘅,而特別版呢?多數係自己買嘅,本身想儲。例如啱啱呢隻《Macross 30》咁,一早訂咗,攞貨之後即時返屋企拍開箱片,拍完都已經成個星期,有冇玩過?冇。之後有冇拎過上手?都冇。

細個大把時間但就冇乜錢買Game,人越大就越冇時間自己玩,好多遊戲都打唔爆。唔係藉口,因為GameoverHK全年無休,所以基本上每日都會做嘢,做完公司嘢做自己嘢,做完自己嘢發覺已經凌晨,第二朝又要8、9點起身,如果唔係我哋嘅FaceBook點會朝朝有新料陪大家返工返學。

當然,見到報導多人like多人share實在係好開心,不過就係因為呢份動力,令到私人時間越嚟越少,有好多遊戲都冇時間慢慢享受,俾著以前,雷電咁正我晨早玩爆啦!超時空唔煲都玩吓啦!好,呻完,希望GameoverHK快啲可以發大嚟玩,帶到更多資訊俾大家之外,可以請多啲人幫手,到時,我哋一定打多啲機,做埋攻略作深度報導,希望大家繼續支持,令我哋變得更壯大!

開箱片重溫

極速開箱片《Macross 30~銀河を繋ぐ歌声~》超銀河箱 Fans必入