fbpx
編輯Blog — 03/03/2013 at 1:03 pm

【編輯Blog】苦茶:Auntie要Note II轉會Xperia Z!? 俾次機會啦阿蛇!

by

 

IT人呢個名, 真係帶來唔少煩!

身邊人買電視、買相機、買手機、買遊戲機、買Tablet、買LED燈、買拖板……總之要插電嘅東東, 你個電話一定要俾人響一響、問問你意見; 你話我係做律師咁, 斷分鐘計顧問費我就爽啫, 但唔係嘛0依家, 永遠喺你最忙、趕影相、趕打稿、做訪問時, 邊做手頭嘢, 邊去「打電話問功課!」, 其實到最後都係要走落舖, 逛一Round、親身陪佢買機先收科, 其實你最終目的都係呢樣0者! 打電話問我幾時出嚟做跟班就得啦! 可唔可以省去「問功課」呢步呢?

話說Auntie QK, 由聖誕煩到我農曆新年, 究竟買Note II好定 iPhone5好……其實喺我心中完全係兩回事, 原因在佢個OS問題, 一個做乜都問過佢先、一個就無法無天!

去「凶宅」試機三、五次, 連最白鴿眼嘅Sales, 都對我呢啲死窮鬼有記憶……阿Auntie由原本覺得iPhone係手機界嘅科技巔峰, 到發現身邊所有人都用Samsung, 呢個轉折, 完全可以用折磨我, 同「與我無關」嚟形容……做人就係咁無奈!

你同佢講系統、CPU、RAM、OS……相信我! 對呢類乜都唔識又無主見嘅買機人, 你只可以講: 「呢部機個款幾靚! 嗱!呢部幾快0架、不過另一部都好快喎! 呢兩部0依家都好多人用……」呢類毫無營養成份嘅意見, 如果你同佢哋講規格甚麼甚麼, 你就係走入外星人外交嘅死胡同, 佢哋傻咗喺度, 事後每隔半分鐘再重覆同一條問題, 呢樣已經係上上大吉! 你話遇着個牛黃發咁、去車公求籤, 你就PK喇! 下下籤係佢要你解釋到佢明……你試過一次就明何解叫「外星人外交」!

到最後點, 基本係由佢自己決定, 買嘅係Note II, 因原因係多人玩!

你以為咁就原事!? 錯晒! 呢兩日, Auntie QK又話聽朋友講, 新嘅Xperia 芒夠大又正, 又話要問我意見! 信我, 呢次佢會落鎚好快, 買硬! 不過我一定要玩失踪! 何解? 佢連轉中文手寫輸入、上Play Store買嘢都未識, 但佢買咗幾個星期嘅新機又要換喎, 佢擺明由一個用家心態變為玩家心態, 仲要係唔知自己玩乜嗰隻, 相信佢以後仲會好頻繁換機, 再同佢出街睇機, 簡直係一個旋渦! 我同佢講我下個星期要出Tripe, 我知係冇意思, 避得一時唔避得一世, 希望佢呢個禮拜忍唔住, 自己走去出機, 佢同「凶宅」個Sales都幾Friend吓, 如果條古惑仔馬得佢住, 我有機會脫身, 一句! 求長生天保佑!