fbpx
主頁, 動漫資訊, 專題熱話, 潮玩新聞 — 01/03/2021 at 3:45 pm

牛佬友情歲月古惑仔漫畫主題冰室開張 浮雕像+牆畫+龍頭寶座打卡

by

Really很開心,「友情歲月古惑仔漫畫主題冰室」擒日正式開張了,作為牛佬Fans,我當然有去捧場喇。叫得主題餐廳,裝潢果然無令人失望,地下大堂嗰幅「友情歲月」剪影畫已經係第一個打卡位,沿樓梯直上,兩邊牆有好多複製主角肖像畫,襯埋懸吊半空嘅四方形燈盒,淨係呢條樓梯都有排影相呀。上到去,收銀機側邊有個迷你展覽廳,裡面除咗有大量歷年精品同公仔書外,張龍頭寶座就梗加要坐一坐吓喇喂。行番出嚟,有大飛加陳浩南加細細粒半浮雕全身像,老實面相只係一般似,但一樣影相影得我好開心。再行入去,打卡位多到爆,牆身有大量原稿複印畫、牛佬加倫裕國文字簡介、複印電影海報、擺滿古惑仔紅酒嘅酒櫃,連檯面都見到一眾《古惑仔》角色影子,侍應們制服印埋角色名字,又係好過癮啫。Menu亦係一絕,做到成本公仔書創刊號咁,初初拎上手,我都俾佢Fake一Fake,以為係甚麼開張限定版港漫,打開,搵同角色有關嘅餸菜名,最搶眼者無疑係細粒粒紅豆冰,不過我怕甜,無Order到,反而Order咗腐乳雞翼餐同芝士鮮牛肉麵餐,認真Mode,$50唔使一個下午茶餐嚟講,性價比超高。As a conclusion,食物水準唔曳,裝修超班地方夠大坐得舒服,我畀99分。扣嘅1分,係同牛佬緣慳一面,搵唔到佢合照。加油呀牛佬,祝生意興隆。

友情歲月古惑仔漫畫主題冰室
地址:尖沙嘴加拿芬道49號A舖
電話:5401 5981

大堂出現第一個打卡位。

 

個人認為,成個場最有《古惑仔》Feel嘅係樓梯位。

 

四方形吊燈盒,點綴樓梯位。

 

陳浩南喺樓梯,歡迎大家光臨。

 

浮雕式塑像,有大飛、陳浩南同細細粒。

 

迷你展覽廳有張龍頭寶座,坐上去影相係指定動作。

 

精品之一浩南刀。

 

《古惑仔》精品。

 

《古惑仔》電影複印海報當牆紙。

 

倫裕國文字簡介。

 

牛佬文字簡介。

 

檯面複印咗《古惑仔》角色,我見到梁家仁同生滋。

 

裝修好有心思,牆壁屢見《古惑仔》原稿。

 

複印原稿有黑白,亦有彩色。

 

大家記唔記得呢段《古惑仔》內文?

 

酒櫃。

 

初初真係俾呢本「創刊號」Fake到,揭開先知係Menu。

 

牛佬,少少建議,呢本Menu可唔可以直頭當精品咁賣?

 

角色突入菜式名,有呢杯細細粒紅豆冰。

 

洗手間都無渣流灘,有大大幅陳浩南牆畫坐鎮。

 

猜猜呢個位喺邊?居然係男洗手間廁格大門。Baby睥住你釋放身體多餘水份,過癮了。