fbpx
主頁, 動漫資訊, 潮玩新聞 — 26/02/2021 at 6:45 pm

《新著龍虎門》九死邪功大晒老天尊復活 甲蟲無厘頭遷怒石黑龍講唔通

by

噓!老天尊喺今期第1086期《新著龍虎門》正式復活,米已成炊,都無謂討論合唔合理咯。想講嘅係,此例一開肯肯定尾大不掉,因為會將《新著龍虎門》嘅武學觀完全崩壞,以後甚麼金鐘罩、九陽神功、易筋經、洗髓經、無相神功、神Or魔Or正統道經統統靠邊站,練到幾高層次都無用,全部人練晒九死邪功咪得囉,反正死N次都可以翻生,其他武功仲學嚟把托咩?最頂唔順係老天尊攬住班仔女嘅骨頭,之後硬生生融入體內重鑄身體骨骼,有無兒戲咗啲?以補充鈣質論堪稱天下第一。至於新出角色掃墓人甲蟲,唔少港漫迷話接受唔到咁猥瑣核突,但我認為不論造型或性格設定都係100%成功嘅,五官、身材同對白固然猥瑣到一個點,對住鐵心張死人相釋放身體多餘蛋白質嗰兩格,我直頭睇到反眼反到出外太空,但話明猥瑣吖嘛,依家咪夠晒猥瑣囉,能夠惹起討論,咪證明成功囉……

But,成功還成功,唔合理就始終唔合理,有無C-Hing答到我,究竟石黑龍幾時參加過鐵家飯局?當真係有出席過,阿甲蟲哥都無理由因為單單妒忌石黑龍有佢「夢寐以求嘅體格」,就喺老天尊面前屈石黑龍殺晒鐵家成員啩?兩人根本就無仇無怨,呢個理由係咪薄弱咗啲呢?仲有,鐵五郎一段都好奇怪,又話死家陣又唔死,想點先?唔係諗住求其用「代西城勇承受了兩強的內勁,反過來略為延命」就當帶過算數呀?毒娃又係怪怪的,明明本身同鐵五郎零交集,打完軍艦島之戰就無端端同鐵五郎做愛兼擺明享受做愛,睇劇情發展仲似會有一段情添,咁Open嘅?不如唔好叫毒娃,改名叫淫娃喇。

 

 

鐵五郎同毒娃無端端上床,毒到High到快要死了。

 

毒娃擅毒,亦擅床上功夫,可以改名「淫娃」。

 

嗱,編劇們,咪諗住兩句說話輕輕帶過呀,記得解釋清楚番點解鐵五郎唔使死呀。

 

骨中骨,肉中肉,喺九死邪功加持下,補充鈣質話都無咁易。

 

甲蟲對住鐵心張死人相釋放體內多餘蛋白質,好難想像《新著龍虎門》會有呢類情節。

 

甲蟲冒認喺鐵令公第六子,我覺得呢條橋又幾新鮮。

 

今期花咗好幾頁,描述甲蟲出身。

 

石黑龍無端被屈,呢Part我覺得最無道理。