fbpx
主頁, 動漫資訊, 潮玩新聞 — 08/01/2021 at 3:00 pm

《王風雷傳奇》邪神著王帝的新衣? 毒龍鑽鑽手肘再出摧心錐係乜玩法?

by

拎今期第11期《王風雷傳奇》上手,只有不斷搖頭嘆息加O嘴,故事睇唔明就預咗架嘞,但有啲位真係連畫面表達同正常邏輯都未達標,我接受唔到。先講龍虎三皇圍攻火雲邪神嗰段,小虎用寶劍刺入邪神雞心,旁白寫「邪神有易筋經加上天蠶寶衣護身,寶劍只能入肉數分」,而畫面呢,係畫到邪神赤裸上身嘅,件天蠶寶衣去咗邊?定只不過係王帝的新衣?睇唔明。三揪一打大佬,啲招數可唔可以合理啲呢,王小虎出電光毒龍鑽,頂吖,居然唔係鑽邪神,而係鑽石黑龍手肘,旁白話此舉能「令推心錐的殺傷力倍數上升」,大佬呀,痴線嘅咩,絕招嚟架,莫講話之後出推心錐,被毒龍鑽鑽完,條手臂仲有得剩?Anyway,fortunately,仲有一期就大結局了,兼提提大家將會喺1月22日出版,下周唔使撲書。

唔使咁複雜,好似王小龍咁一招了,正正常常出降龍十八掌打爆邪神個頭咪好囉。

 

火雲邪神終歸一死。

 

我睇到嘅,係寶劍直接鑽入肉,但唔知點解又唔畫埋標血喎。

 

毒龍鑽唔直接鑽邪神改鑽手肘,條手臂真係頂得住?

 

明明簡簡單單出摧心錐就OK,唔明點解要搞到咁騎呢。

 

說好了的天蠶寶衣呢?唔覺眼嘅?定只不過係王帝的新衣?

 

要讚番,今期《王風雷傳奇》封面係幾靚嘅。