fbpx
主頁, 動漫資訊, 潮玩新聞 — 07/01/2021 at 9:15 pm

Un頂able! 喪屍打邪神+毀容多對角+珍珠變瀕死的巨人?

by

唉,睇完今期第1078期《新著龍虎門》,有幾處真係連我呢個港漫死忠都Un頂able。一,第9頁珍珠之死,珍珠無厘頭俾天下無敵整死,我唔覺得突兀,想當年舊著《龍虎門》老祖完出場,只不過因為要搵紫河車,就無仇無怨地殺死銀鈴取腹中塊肉,家陣珍珠死無全屍,反倒符合人物一貫濫殺性格,突兀嘅係構圖,天下無敵企喺插住珍珠嘅震乾坤劍柄上面,透視同人體比例Totally錯晒,珍珠畫得過份地大,變咗「瀕死的巨人」,天下無敵畫得離譜地細,變咗雪姑七友啲Friend。二,第24頁喪屍圍攻,天下無敵大把絕世武功,搞乜要用甚麼「九死邪氣」啟動死屍打邪神?喪屍識打交?唔知仲以為睇緊《The Walking Dead》。三,第32頁勇哥毀容,雖然書名叫〈西城勇之死〉但一早估到勇哥唔死得,Fine,就當毀咗容代表天下再無西城勇獨剩火雲邪神,但毀容正正經經畫到眼盲裂嘴崩耳面爛And頭髮燒光咪得囉,因乜解究俾地心熔岩一燒,會燒到額頭起對角呢?千萬個唔明。好彩,第7頁有句令我稍稍安心嘅旁白:「雖僥倖逃離天牢,但心知一刻鐘內必遭強制逮回」,未知「一刻鐘」有幾耐,但總算暗示咗天下無敵最後都會收歸番虛無,搞局唔會搞得好耐。真心Mode,夠嘞,跪求編輯大人,完咗呢輯〈獵龍屠神篇〉後,希望《新著龍虎門》以後唔好再有天下無敵嘅出現,一期都唔好,一頁都唔好,一格都唔好,出現喺邊個邊個角色嘅回憶裡面都唔好,真係怕怕了,萬謝。

一見地球我就驚,好驚《新著龍虎門》又《龍珠》化。

 

透視同人物比例錯晒,珍珠無端端變咗「瀕死的巨人」。

 

毀容都毀得型過人,居然可以毀到起角!

 

上一刻喺軍艦島,隔十頁八頁已經打到去富士山,會唔會誇張咗啲?

 

打打吓仲要打喪屍添,唔知仲以為睇緊《The Walking Dead》。

 

上期武功全失,今期瞬即回復二間,打針都無咁快。