fbpx
主頁, 動漫資訊, 潮玩新聞 — 01/01/2021 at 8:30 pm

《新著龍虎門》又出老祖宗搞局!邪神劈開兩半都黐得番埋?

by

《新著龍虎門》之〈獵龍屠神篇〉去到尾聲,打完一大輪,火雲邪神居然衰喺韋陀手上,係有少少始料不及,但更始料不及嘅係天蠶功。原來,天蠶功就好似AA超能膠,誇張到可以將一個差唔多齊中切半嘅人黐番埋一齊,好,就當你功力高高高高高高過喜瑪拉雅山,夾硬用兩手夾實個頭就可以唔爆,但又關啲甚麼佛家六識乜事呢?Cut「鼻」、「舌」同「意」三識就可以自我療傷,Cut晒六識會唔會升仙Or變超人?基於勇哥係男一唔可以整死佢嘅鐵律,就如此這般失憶敗走算係合理收場,但要佢失憶唔使搞到咁複雜兼無厘頭喎,使乜Cut意識啫,搵神武英明呀、韋陀呀、龍貫天輪流狂藕佢個頭咪得囉,藕到失憶都仲未夠咩,索性藕到佢癡癡呆呆之後又不屑殺之,成件事咁樣處理會唔會順眼啲?另,臨尾嗰頁於我極震撼,唔係畫面表達好震撼,唔係因為珍珠死所以震撼,而係把震乾坤令我震撼,唉……做乜又出老祖宗呀,老宗祖一出場,之後嘅故事又會九成九暴走了……

 

天蠶功啟動,夾實兩邊唔畀個頭爆。咁都得?

 

頂呀頂,一味靠天蠶功死頂。

 

療傷就療傷,唔知點解又要關佛家六識事。

 

其實要搞到邪神失憶,唔使講到要Cut意識咁複雜。

 

喺天蠶功底下,記憶就好似㩒個「Delete」掣咁,話刪就刪。

 

點解?點解又關老祖宗事?點解佢又可以掙脫虛無重返人間架?我好驚呀,好驚故事失控呀。