fbpx
主頁, 偶像資訊, 潮玩新聞 — 22/02/2013 at 5:03 pm

曼城球星Harlem Shake

by

都係嗰句:「世界唔應該係咁。」呢個世界真係越騎呢越不知所謂越低能越反智就越受世人歡迎?先唔明點解《Gangnam Style》會風魔全球,到依家更加唔明Harlem Shake點解會大熱,會有咁多人跟風跳呢隻傻仔舞。

睇過不下十個版本嘅Harlem Shake,不論任何時間、場景同人物嘅版本,我都睇唔明究竟Shake緊啲乜,橫睇掂睇,都淨係似一班喺青山走出嚟嘅精神病患者,盲無目的地Fing手Fing腳、發晒癲咁彈來彈去。好Funny?真係唔覺!Anyway,Harlem Shake旋風已經吹襲英格蘭球壇,曼城領隊文仙尼都唔知搞乜,唔好好督促班球員備戰,仲容許佢哋扮傻仔大跳Harlem Shake。據稱高佬中鋒迪斯高、全能中場占士米拿、大隻佬米卡李察士、門神赫特、刀疤左閘尼士葛同買番嚟擺多過踢嘅史葛冼佳亞都有份參與,不過佢哋全部以Iron Man、蜘蛛俠同聖誕老人等造型出現,唯一全程見到樣嘅球星只得重砲高拉洛夫,短片裡面,高拉洛夫Cool到爆,全程蹺埋對手郁都唔郁,仲黑口黑面無水洗面,表情疑似非常不屑,話唔定佢都係被迫大圍跳呢隻低能舞,唔多Like所以咪黑面囉。 http://www.youtube.com/watch?v=dkiPdNw1Q4I