PS4, 主頁, 專題熱話, 遊戲新聞 — 01/06/2020 at 10:47 pm

【冇劇透】首個評測解禁 《The Last of Us Part II》率先試玩

by

今日(1日)晚上9點,係先前得到《The Last of Us Part II》傳媒試玩遊戲後,第一次可以出嘅評測,不過只能夠用廠方提供嘅截圖同短片。咁就簡單講吓感受先,玩過第一集嘅,第二集都好易上手,就算多咗跳呀爬呀呢啲動作,都唔會覺得突兀,其中行路時無聊狂撳跳掣,有啲諗起玩同廠另一大作《Uncharted》……

玩過上一集嘅,對殺感染者都應該已經好熟手,最有效梗係潛行擊殺,如果有唔同程度感染者同場時,就要諗吓有咩戰略,因為初期感染者係睇到少少嘢,咁Clicker就完全睇唔到,咁就要睇位置分佈嚟決定點殺敵。而且今次人類敵人嘅反應真實咗好多,又有識用嗅覺搵你嘅巡邏犬,好麻煩。
比較特別嘅係,如果同場有感染者同人類敵人,你就可以用掉樽嗰啲聲音搞到佢哋互相廝殺,食完花生之後,先出去執死雞。
橫掂未出得片,所以自己都玩得比較慢,暫時玩咗幾個鐘,講到玩法,今次亦都鼓勵玩家唔駛殺晒同一地區嘅敵人,有時可以避得就避,不過對於有清場癖好如我嘅玩家,同你講都無謂嘅。
至於劇情,第一次評解禁嘅部份好有限,只限於前段章節「尋找諾拉」一段,地點係西雅圖。不過可能你都知啦,網上已經流傳好多劇透,只能夠講,如果你到依家都未「被感染」,建議你潔身自愛,因為自己一路玩一路睇劇情發展係好驚喜嘅。
最後預告一下,遊戲推出前,試玩嘅傳媒會有新影片可以出,敬請留意。

【GameoverHK網上商店開張】
https://shop.gameover.com.hk/

 

想即時睇到更多日本文化、ACG、網絡最新資訊,請即加入facebook!
https://www.facebook.com/GameoverHK/