主頁, 動漫資訊, 潮玩新聞 — 28/05/2020 at 9:30 pm

黃玉郎《龍虎5世3世仇》創刊 讀後有感

by

預咗洗版,今日人人都談論黃玉郎新書《龍虎5世3世仇》,我當然都有真金白銀捧場,閱畢全書有幾樣嘢想講講。先講封面,三拉頁,邱福龍出手無嘢好彈啦,畀100分唔過份。畫功方面,肯肯定靚過《新著龍虎門》,希望唔好係新創刊三幾期式虛火。內容呢,都係龍龍虎虎咁喇,你可以話老土,但我又真係幾Buy呢種睇慣睇熟嘅玉郎味。武功方面,金鐘罩、易筋經同六神訣零驚喜,招式名稱有少少趕客,甚麼「金剛錐鑽」又「錐」又「鑽」,「錐」完就梗係「鑽」架啦,是但掟走一個字係咪會好啲呢,另一招「大鵬金翅斬」就直頭好似無諗過咁,求其湊夠五個字算數,唔多討好。劇情推進方面,第一期主要介紹角色登場,有文場有打戲,OK合格喇,不過中間介紹「曹清柔」同「東野虎」出場嗰兩格,使唔使霸晒一頁Full Page咁誇張呀?專欄方面,「創刊詞」、「彬彬有禮」、「點滴在心頭(1)」同「玉郎一周」屬大路嘢,好彩象嘅四格漫畫尚在,不過就順勢改名,由「龍虎三傻」變成「瘋狂5世」,一樣笑得出。As a conclusion,我係會繼續撐嘅,黃玉郎加油呀。

《龍虎5世3世仇》創刊號。

 

龍少負責三拉頁封面,靚到犯規無得輸。

 

金龍,用金鐘罩。

 

修羅門宗主,用易筋經。

 

女主角曹清柔,使唔使畫足一頁咁大格?

 

象嘅「瘋狂五世」四格漫畫尚在。

 

「金剛錐鑽」同「大鵬金翅斬」呢兩招招式名,我頂唔順。