fbpx
Android, iPhone, Mobile games, 主頁, 手機/電腦 — 19/02/2013 at 3:00 pm

《古惑仔3G》週記攻略二:包金最強神裝大披露

by

《古惑仔3G》週記攻略第二期!啱啱踏正過農曆新年,好多Player同我一樣,都遇到要兄弟定要黃金嘅人生交叉點,但據我偷取GameOne「國家機密資料」,在線人數0依然爆晒,所以大家仍然係好兄弟!

Post Board熱鬧似Chat Room

話晒新正頭,點都要講返幾句好說話;意頭嘢,出嚟行最緊要老嚟嘛!不過就初一至初七所見,唔知點解啲恭喜發財,硬係同買波、買馬呢啲另類偏財話題賴到上邊……真係非常玩嘢、非常有江湖味道,可能大家真係相當投入出嚟行「古惑」啦;正因為此,好多人都勁讚個大廳Post Board,係成隻Game最吸引人嘅賣點之一!不過講開又講,幾百人齊齊吹水,想當年Chat Room最熱爆年代都冇咁墟冚過,都莫講話0依家嘅Whatsapp或Line啦!仲要三九唔識七、扮乜/吹乜都得,呢啲咪吹水RPG、一Game兩玩囉!

解構兄弟榜首位 251人叠馬仔

正所謂唔威做乜出嚟行?咁就不得不題最近最多人熱講嘅「兄弟榜」!呢個榜攞第一好簡單,就係要你「個人」名下夠叠馬!就0依家遊戲設定,擺放人物表最多就係得嗰10頁,所以旗下馬仔上限應該係250人,我知!我明!好多人都已經攞到盡,仲有幾十人都已經攞咗第二名,但唔知點解第一名嗰位大佬──「鬼盆社」,竟然可以收到251人囉!

最後經我黑白二道明查暗訪,謎團終於解開喇!答案原來喺《PC Game Weekly No.734》度!事關呢期書附書《古惑仔3G》上位三寶,一個QR Code就送你啤酒、摺凳同靚坤,而阿「鬼仔哥」,就喺攞滿250人後,再用呢個小密技,收到第251個人頭!係!呢個「人物」同大家質爆道具欄時一樣,會去咗下一版嘅隱藏頁面、用唔到!不過遊戲係會照計人頭囉!哎!所以話呢……0依家出嚟行,唔好樣樣嘢都講打講殺,得閒要讀多啲書就係咁解啦!

神裝包金有相睇

對於iOS剛開波嘅新手,最熱爆討論問題,應該係點先算係神裝?分辨好簡單,金色嘅就係係喇!為咗呢件事,我仲專登走上GameOne總壇,認咗Game Designer阿浩哥做契爺,再加兩杯到肚,最後佢終於應承送一套俾我!裏面包括有狂人巨斧、開光大刀、耀揚軍刀、南哥背心、天收大褸、車仔風褸同五虎西裝呢幾樣!如果大家以後見如有雷同、實屬巧合嘅物品,就記得出去劈友先好用,損壞度得返幾十巴仙時,要記得修裝,因為唔係咁易再執得返!

你哋好羨慕我?唔使喎!我都可以送一套俾你!就係下面幾張JPG相!話說飲茶灌水後第二朝,阿浩哥就係送呢幾張相俾我,佢話呢個係為咗遊戲平衡度同公平原則,所以我都馬上入紙取消上契,呢個世界邊有咁多不勞而獲吖,大家出力啲同我「打」……《古惑仔3G》啦!

守地盤 佐維靚媽係首選

講到搵黑金最快,好多人都淨係識殺人奪貨……哎!我問過阿浩哥,其實打地盤、守地盤,唔浪費行動點,又夠鐘收租,其實呢個先係走精面!不過守地盤,當然有一定技術含量啦!

第一樣要識嘅,一定係「領導力」技能!一般情況下,守地盤設計只有6人,包括話事人、紅棍、睇場、打手同兩個靚仔;不過,如果你個話事人,有「領導力」技能,就可以增加守衛上限,如果「領導力」去到10級時,更可增加打手18人,即係總數達到24人!我知有啲資深玩家,已經開始發現呢點!一般有「領導力」角色,多數都喺漫畫書度做過龍頭,例如浩南、山雞、大東、南鯨呀咁!

至於守地盤首選,暫時可以話以佐維同靚媽最當打,首先佐維爆擊同迴避夠高,迴避高好處係攻方好難打到你,而且爆擊可以加乘你嘅反擊力,不過前題係攻方無「全攻形」五技人!因為超必係冇得迴避0架!如果攻方用「磨」的戰術,打到你啲角色爆裝,佐維嘅迴避同反擊能力會大幅下降!

至於靚媽,係一個血牛類型,一般LV.99情況下,血量都可以達到9,000-10,000(普通角色可能只有5,000-7,000),如果對方依舊用磨的戰術,都會有一定難度,不過反擊力就比較一般,所以大家守地盤時,可以混合使用。

小道消息:嚟緊有新角色!

講到最後,識咗呢個霧水契爺,都唔係話無著數嘅,因為我收到風,嚟緊不久後,《古惑仔3G》應該會有新角色加入,包括有立花正人、天收、鬼王等,不過當中最期待嘅,一定係戰神級嘅地中海,據知佢可以話同大梵、水靈完全同級好揪!唔想人有我無嘅話,大家真係要得閒無事,著意啲抽!

 

用iPhone/iPad嘟一嘟即刻Download《古惑仔3G》

用Android手機嘟一嘟即刻Download《古惑仔3G》

遊戲名稱:《古惑仔3G》

伺服器:香港伺服器

遊戲類型:經營社團動作遊戲

代理公司:Gameone

開發公司:Gameone

支援平台:Android2.0.1或以上 /  IOS 4.3 或以上

官方網站:http://tb3g.gameone.com/

facebook專頁:http://www.facebook.com/TeddyBoy3G