主頁, 動漫資訊, 潮玩新聞 — 01/05/2020 at 2:15 pm

牛佬《古惑仔》大結局 遺憾伏線無收尾

by

一個時代的終結,縱不捨,要完始終要完。28年歷史《古惑仔》喺第2335期正式完結,好難想像以後嘅周一同周四無《古惑仔》睇嘅日子,點都好,多謝牛佬帶畀我咁多年歡樂,真心的,很多謝……
睇完最後一期,欷歔完,我諗大多數讀者都同我一樣,會遺憾以下幾條伏線無完整收尾。一,立花正仁中刀跌落海,未見屍,代表真係死咗?二,佐維同大梵呢兩個神人,下場如何?三,大飛無報殺子之仇,世飛死不瞑目;四,游子健話晒係陳浩南個仔,提都無提;五,李成克、九尾狐同佐敦嘅三角關係未解決,九尾狐情歸何處?其實要數嘅仲有好多,不過都明白嘅,話晒二千幾期有N咁多個角色,要交代嘅牛佬已經盡量交代。反而我有少少嬲嘅,唔係未交代晒所有角色去向,而係都最後一期咯,點解要咁狠心整死伊文華?死相仲要同佢老豆伊健一樣,一棍穿心,寧死不屈。佢嘅死,只佔全書一格加幾句旁白,唉。
故事以陳浩南回憶一生女人同摯友作結,係幾有味道嘅,但我覺得漏咗幾個重要人物。韓賓同十三妹唔係Friend?應該加番落去;初出場嘅包皮、巢皮、牛姑甚至牛雄都應該佔一席;雖然同山雞反目成仇,但畢竟曾經係好好好好好兄弟,無理由漏低佢;次次有乜大鑊嘢都搵迪文幫拖,佢都應該有份;數到女人,除采妮、細細粒同阿夜外,Baby都算影響陳浩南一生,照計應該Count埋……Anyway,舊嘅唔去,新嘅唔來,期待兩個月後牛佬新作面世,必撐。