主頁, 動漫資訊, 潮玩新聞 — 11/12/2019 at 8:44 pm

牛佬《古惑仔》評價年輕人 立花正仁吹到啤一聲

by

今期第2294期《古惑仔》,牛佬透過立花正仁應承久野一郎擔當「暗黑之門」教練一幕,對時下年輕人作出評價,總結為「不太理會別人,只會埋首手機;不懂與人溝通,根本,連說話都不會;不會寫字;完全欠奉禮貌」。我認同牛佬睇法,實情我每日返工都見到一大班呢類廿零三十歲低頭族同事,佢哋唔算無禮貌,見面會點頭,但點完頭後會極速耷低頭閃開,寫字肉酸到震,唔多講嘢但講親嘢都一舊舊,無厘神氣淨係識Loop手機。面對佢哋,我覺得好應該學習吓立花正仁嘅思維:「世界既然變成這樣,我們就得適應,世界──是年輕人的嘛!」牛佬呢段寫文戲寫得好,好正面,無錯立花正仁俾班後輩吹到啤一聲,但世界確實係屬於年輕人,所以老屎忽們切忌敦起個食鹽多過你食米款,亦切忌阿芝阿佐將「呢一代好唔掂」、「一代不如一代」之類說話擺喺口邊,總之互相尊重就可以了。不過呢,有樣嘢我就真係一億個頂唔順,話說劇情提到尚未畢業嘅殺手重信同清隆,同檯食飯都要用WhatsApp溝通,好似啞咗咁。Sorry,你話我老土都係咁話,呢種所謂新一代溝通文化,我真係接受唔到。人都坐喺你側邊咯,都仲要篤篤篤溝通?把口不如用紅毛泥封咗佢喇。