Online Game, PS4, 主頁, 專題熱話, 遊戲新聞 — 06/11/2019 at 8:01 pm

【GameoverHK試玩片】到底玩乜?《Death Stranding死亡擱淺》評測解禁 團結全世界呃Like

by

DEATH STRANDING™

GameoverHK兩星期前從SIEH取得小島秀夫創立Kojima Productions後第一隻作品《Death Stranding死亡擱淺》,試玩咗幾十個鐘,今日終於到咗可以解禁之日。不過都有限制,就係唔可以劇透啦。故事自己探討,但呢篇文都可以解釋到大家最大疑問,到底隻Game玩咩?講兩句等大家放心先,就係小島秀夫fans一定滿意,而且除咗四圍走送貨之外,一樣有需要潛入嘅地方,一樣有揸槍掉彈打Boss嘅戰鬥,一樣有小島最拿手嘅惡搞元素。例如今次嘅重點項目,係呃like呀!
(張截圖係我炒車後嘅慘況,仲有想講,玩啲隻遊戲要坐近啲電視,啲字又細又多)

DEATH STRANDING™(張截圖係我炒車後嘅慘況,仲有想講,玩啲隻遊戲要坐近啲電視,啲字又細又多)

你話我長氣都要講多次,如果係小島fans,唔駛諗,買嚟玩啦,新川洋司啲設定又正,啲歌又好聽,而且劇情發展依然係重點,依然好多片睇。

有潛入有戰鬥
影片呢兩日會出,睇咗字同圖先。咁玩咩先?一路行一路行,去唔同地區做唔同任務,既然唔講故事,快快講幾句介紹。操作有啲似小島秀夫對上一隻作品,行、跑、換裝備、踎低、閉氣等等,有啲位要潛入敵陣攞番屬於自己嘅嘢,亦都有用繩從後勒暈敵人呀,用槍索住敵人呢啲玩法,匿埋喺長草堆潛行,大家玩慣玩熟嘅潛入能力可以大派用場。不過唔係一開始就有得玩呢啲,俾啲耐性玩多陣先。

送貨任務唔容易
而主打嘅送貨任務,你以為好悶,其實就好似你去旅行之前編行程咁,要喺地圖搵最佳路線嚟行,可以順路送多幾件貨一次過完成幾個任務,但又要計個人負重,仲要小心平衡,啲貨叠得太高都不適宜,仲要諗帶咩裝備隨行,都忙o架。爬山落水乜都有,又盡量避開敵人區域啦。有啲位要用道具幫手,如梯、繩索,玩咗一陣就會有其他載具,不過遇到崎嶇路段,都要諗吓用咩方法先可以揸到部電單車,因為電單車衝落太深水唔得,太斜嘅斜坡又爬唔到,有啲可以硬爬,爬爬吓又得,但又隨時跌落山,啲貨散晒部車又壞埋。

網上元素其實重要
咁點呃like呢?雖然冇PVP亦冇合作,亦唔會喺遊戲見到其他玩家角色(會遇到NPC送貨員),但其他玩家會留低貨物同埋道具,你亦可以放低啲貨喺特定地方俾其他玩家幫手送貨。例如佢整咗條橋放咗條梯或留低繩索,咁其他玩家「聯繫」咗嗰個地區之後就可用到,而且你用人哋啲嘢,亦可以俾個like人,相反你留低咗啲好嘢,人哋又會讚番你,估唔到打機都要呃Like?係呀!唔只留低嘢幫手得,仲可以自拍呃like呀,你睇小島秀夫日日都更新Twitter,就會明點解呢隻遊戲入面咁多社交平台元素!仲有咩?出game自己搵驚喜啲喎。

 

起路起橋情況,呢個打印場面,其實令我諗起《Gantz》。

 

除咗計路線,仲要計重量,仲要小心平衡,啲貨叠得太高都不適宜。

 

送貨做任務可以升級。

 

 

送貨前要睇地圖,畫路線。

 

仲要湊B,由開頭覺得好鬼煩到之後覺得佢幾可愛,o依家直頭鍾意咗小朋友,想自己生一個。

 

應該係遊戲入面其中一個贊助。

 

嗱,堂堂明星你自拍到咁,咪呃到like囉。

 

廁所仲有幫主角Norman Reedus宣傳佢個電單車節目,應該冇收錢,小島好有義氣。

 

遊戲中仲有郵筒,可以放低幾件貨,又可以叫其他玩家幫手送貨。