編輯Blog — 10/02/2013 at 8:42 am

[攝影師Blog]小明:創意消失於維園英雄地!

by

上次講團年燒炭,今次講花市自殺,大家會話,大吉利事,新年流流,就係新一年先要講。事源係前兩日去行花市,當然,維園呢個英雄地我係唔會去,因為插針都插唔入,我純係買盤水仙擺下應下節,如果喺維園返到屋企,我諗盤水仙最後會變成標本。所以去咗荃灣花市,人少少。目標物件在眼前,只係48大洋,但有七八個花芯,正啦,咁一場嚟到,都行個圈望望有咩應節擺設,做個本地消費人啦,點知行咗好幾行,發現大部份嘅貨品都一式一樣,大陸貨都唔緊要,點解成行都係氣球,仲要係舊貨,點解成行都係工展會嘅舊貨,點解成行都係冰糖葫蘆……

點解啲創意只會喺維園出現,仲要係越來越少!! 唉! 香港成日話要轉型,都唔知轉左啲咩出嚟,如果有去開泰國,台灣,日本嘅朋友,大家會見到佢哋啲貨品,期期都有新嘢,所以大家隔一段時間就會去下,幫自己屋企加啲生氣, 換一換衫,我問問大家,有幾何喺香港消費呢而家? 香港仲有冇可以值得行嘅地方? 一年一次嘅年宵除咗去人迫人之外,其實佢嘅作用係咩呢? 大家唔使去諗,留俾政府去諗,就連十大金曲都可以提議唔做,係因為樂壇已死,定政府有問題,今年我都要好好思考下呢個死海定死水嘅問題。祝大家日日創意無限!