PS3, 主頁, 專題熱話, 遊戲新聞 — 03/02/2013 at 10:47 am

《Lightining Returns:FF XIII》中文版預告 鳥山求訪問 戰鬥中可移動 雷姐談戀愛!?

by

今次去台灣遊戲展,其中一部份就係睇製作人鳥山求介紹《Lightning Returns:FF XIII》新原素同埋做訪問。以為又係講嗰啲,點知有堅料,首先最令我驚訝就係今次戰鬥系統改變幾大,雷光喺戰鬥中都可以用Analog掣操控移動,加入動作遊戲原素!唔同裝備型態更各有一條ATB Bar!至於訪問內容,有中國傳媒就問:「平時cool爆嘅雷姐,今次會唔會有拖拍吓呀?」開發總監鳥山求點答?入嚟睇!

加入動作遊戲原素
今次開發總監鳥山求去到台灣,主要係帶嚟新情報同埋遊戲中文版預告。睇嚟開發進度良好,既然話年尾先出,咁照計中文版應該可以好似上集咁同步推出。記者會嘅試玩片雷姐依然留喺「路克瑟里歐」呢個城市,但戰鬥時就帶嚟驚喜!雷光可以喺戰鬥中移動,雖然行得慢,但即係可以喺戰鬥中都揀有利位置發動攻擊!而且攻擊、防御都要睇啱時間按掣,仲可以避開敵人強勁嘅攻擊!喂咁咪好忙?所以如果揀用呢種新搡作模式嘅話,三角四方嗰幾個掣就代表咗唔同指令如攻擊、防御等,一按即出,好有動作遊戲feel。鳥山求就話:「不過呢隻唔係完全嘅動作遊戲,所以戰鬥中角色移動嘅速度唔會好快,主要係睇啱時機作出唔同按鍵嘅操作。」當然,唔熟悉玩動作遊戲嘅,都可以揀傳統指令操控。

破解變打暈
另外今次戰鬥時會有3條ATB Bar,分別代表唔同裝備、服裝嘅雷光,可以隨時按R掣換裝,靈活攻防。而上兩集中打爆敵人嘅「連鎖與破解」系統今次都進化咗,就係擊中敵人弱點,敵人就會被擊倒打暈任你砌,唔再係打到佢飛天唔準跌落地。而喺地圖上面移動時,ATB Bar都有用,就係可以幫雷光衝刺,跑得快啲,亦可以做出跳躍等動作。而見到敵人後仍然可以好似之前咁偷襲,不過眼睇今次就唔係BREAK咗敵人,而係可以喺戰鬥開始時減低敵人體力,例如一開始敵方已經減咗25%能源咁。

最緊要準時 商店數目歷代之冠
故事係講世界仲有13日,雷光就要喺大限時間內拯救世界。鳥山求實機試玩時就睇到畫面右上角有個鐘,呢個就係遊戲世界入面嘅時間,另外亦會顯示仲有幾多日末日,吓?1日?鳥山求先生話:「雷光開始遊戲時唔會係有13日時間,不過隨住玩家完成任務,日數會增加。另外時間係今集好重要原素,例如穿梭唔同區域,搭火車就要留意時間表同班次,要準時去到車站。」呢個稱為World Driven嘅概念,今次都係遊戲嘅關鍵重點。遊戲世界都會跟24小時運行,商店會喺夜晚關門,而食店就可以幫雷光回復體力。不過唔使擔心,之前嘅回復劑都有喺度,只係多個選擇俾玩家啫。商店中仲可以買到唔同技能,鳥山求仲話今次嘅商店數目會係歷代之冠!

重要角色新區域現身
記者會中仲公佈咗新地區,分別係大自然「The Wildlands」同死亡沙丘「The Dead Dunes」。睇之前嘅片段都見到,第二集嘅「諾艾爾」會出場,佢喺今次嘅世界中會被稱為黑暗獵人,仲有,嗰位新角色中文譯名叫露密娜,呢個有時幫人有時玩人嘅小惡魔,仲話佢好似同一個人……你哋又覺唔覺佢似邊個?而遊戲期間,雷光都會聽到有把謎之聲輔助佢,呢個就係前兩集都有嘅「霍普」,佢似乎喺某個場所同雷光聯絡。

Q&A時間 獵奇問題:
問:今集雷光會唔會談戀愛?
鳥山求:哈哈,呢個我答你唔到,不過只可以話你聽佢係會有一個好完滿嘅結局。

問:改變服裝之餘,有冇諗過可以改變埋雷光嘅髮型同顏色?
鳥山求:遊戲系統係可以做到,我哋都曾經試過,不過效果麻麻,唔係好啱雷光嘅型像,所以放棄咗呢個念頭。

問:今次會有陸行鳥出現?
鳥山求:呢個都暫時無可奉告。

*以下皆為開發中畫面
© 2013 SQUARE ENIX CO., LTD. All Rights Reserved.
CHARACTER DESIGN: TETSUYA NOMURA