主頁, 手機遊戲 — 10/04/2012 at 12:09 am

打電話無人幫拖?

by
Ah~Lu~Ah~Do,Ah~Lu~Ah~Do,Ah~Lu~Ah~Do,瓦努阿圖,我想住嘅地方。 擺明抄N年前由陳啟泰主持嘅亞視節目《百萬富翁》,呢個瓦努阿圖洗腦式廣告真係笑爆嘴,iPhone game「三國小豬R爆頭」正正係手機版《百萬富翁》,有六百條問題等你挑戰,問題範圍都好廣泛,既有成語題:「中國成語故事中,孔融曾經讓出甚麼食物給兄長?」又有娛樂題:「周星馳電影《功夫》裡,包租婆由那人飾演?」仲有生物題:「請問蒼蠅的味覺感受器在身體那一個部份?」講真,有啲問題都幾難吓,唔識答一啲都唔出奇。 玩法一樣,答案四選一,要一次過答中十五題先Bingo,每答中一題就俾個「叻」你,同樣有50/50、問現場觀眾同打電話問朋友求救,最搞笑係朋友只得四個,分別係蚊豬小姐、劉備大兄、關羽義哥同張飛小弟,而呢位四位朋友又唔一定得閒聽你電話,會直接飛落留言:「你打嘅電話號碼暫時未能接通,請你遲啲再打過嚟啦。」聽到,我都忍唔住唧一聲笑咗出嚟。

搵朋友幫拖,居然掛線,玩嘢咩?

 

蒼蠅嘅味覺感受器喺邊?鬼知咩。

 

版面都幾顏色豐富,唔太Old School。

 

孔融讓梨,我讀過書,呢條我識。