主頁, 手機遊戲 — 10/04/2012 at 11:59 am

畜牲,你咪走!

by

畫面花到呢,少啲眼水舞佢唔掂。

呢個iPhone game叫「Find Animals」,直譯,我會叫佢做「搵畜牲」,玩法超低能,山羊、肥豬、大象、企鵝、母雞、熊貓、白兔、馬騮、海獅、海馬、雀仔等等等等海陸空飛禽走獸喺下面嘅輸送帶輪流出現,你要限時內喺上面揀番相同畜牲配對,都係純考反應嗰類免費Game啦。

 

各級難度有九關,慢慢玩啦。

 

難度分三級,即「Easy」、「Medium」、「Difficult」,各級難度又分九關,搭地鐵無聊,我玩晒廿七關,觀塘去到油麻地,剛剛好玩完。理論上只要有眼睛,「Easy」同「Medium」兩關一定Easy灼,係「Difficult」呢關惡搞啲,惡搞在一次過出七七四十九隻畜牲俾你配對,眼水少啲都唔掂,啲畜牲仲要閃來閃去,以為篤中啦,佢又忽然閃走咗,又要重新搵多次。頂佢個肺,唔係吹水,我真係玩到人中都有少少出汗呀。