PS3, Xbox360, 主頁, 遊戲新聞 — 17/01/2013 at 11:28 am

新圖發佈《Killer Is Dead》殺手索女打怪物

by

噚日就有《Fami通》雜誌圖,今日就已經有官圖發佈。呢隻角川Games X Grasshopper嘅第二作,由須田剛一擔任製作人嘅PS3/Xbox360《Killer Is Dead》,雖然有少少《Killer 7》同《No More Heros》風格,但就係全新故事。今次新圖見到男主角加御姊上司同萌妹助手,仲有敵人同背景設定等原素,我只可以話人設同玩法絕對啱心水,夏天推出,極期待。

遊戲嘅主角係一個叫Mondo Zappa嘅美國人,黑西裝,職業係一個神秘組織嘅「處刑者」,極受年輕女性歡迎,鍾意食雞蛋。佢嘅上司就係25歲嘅Vivian Squall,即係打出心口嗰個女角,平時好冷靜,但一講私人話題就會緊張起嚟,好鬼可愛。至於阿日本人Mika Takekawa就係20歲嘅助手,天然呆類型,最擅長係整雞蛋料理,同男主同住……好喇,咁故事係講咩呢?唔係好耐嘅未來,人類去咗月球生活,仲可以利用科技改造自己嘅身體,男主角隻左手就係例子,但係佢就完全冇左手改造時嘅記憶,而遊戲開端就係男主角受到神秘組織嘅招聘,呢個組織個老細叫Brian Roses,65歲美國人,退休前仲係組織中最強嘅處刑者 ……敵人方面係一名偷取咗一個音樂家技能嘅罪犯Victor,著到成個莫札特咁,可以用音樂控制人類。

遊戲以動作為主,武器可以改造強化,男主角隻左手都係,而男主角就要靠不斷戰鬥嚟吸收怪物型敵人嘅血液,再化成dark matter而增強Adrenalin Burst呢種可以引發必殺技嘅能量。背景方面就見到有日式建築同埋西式洋房。

資料來源
http://www.famitsu.com/news/201301/17027344.html