主頁, 動漫資訊, 潮玩新聞 — 24/12/2012 at 10:30 am

創刊號《石黑龍傳II》白蓮聖上的遺囑

by
《石黑龍傳II》創刊號$15

我知,呢條News確實係遲咗兩日,但無計,創刊當日落樓下報攤,相熟老闆娘話:「勁喎,賣晒喎,我都唔知點解賣晒喎。」翌日,天寒地凍又懶得落街,搞到今日先買到,點都好啦,遲到好過無到喇。
齋睇畫風、人物面相同分鏡,《石黑龍傳》同《石黑龍傳II》應該屬同一製作班底,以創刊號講,左石黑龍大頭、右王風雷大頭、中間白蓮聖上默然低首跨頁封面算幾有氣勢,但內文公仔就……講真,確實,事實,真係……一般咗啲啦,尤其嗰個甚麼東方真龍,嘍囉到唔嘍囉,完全無高手風範。彈完,讚番,故事推進明快係優點,一開波就交代各主要角色立場,忠奸二分,一清二楚,韓國女總統崔真善聯同王苦海、金鵬、銅聖老、何勇企圖殲滅白蓮教,王伏虎、王風雷同石黑龍同一陣線,如無意外應該力抗到底。聖上遺囑究竟旨意誰登上教主寶座呢?畫功係就係削咗啲,但如無意外,我都會每周乖乖畀十五大元捧場嘅。

隨書附送2013年曆卡,有四款選擇,記得問報攤索取,咪蝕。