fbpx
主頁, 影音新聞, 電影 — 13/12/2012 at 10:00 am

新片速報《古惑仔:江湖新秩序》最新預告

by

正!有得睇《古惑仔:江湖新秩序》預告片,成條片分半鐘多啲,交代晒劇中主要角色人物,不過奇在明明大隻謙係第一男主角,但呢條片最搶眼嗰個居然係飾演o靚坤嘅沈震軒,其金毛造型、說話之癲癲喪喪同行為之乖戾,十足十似漫畫裡面嘅o靚坤。

大隻謙話:「阿大,我陳浩南係真心跟你嘅,希望你可以收我哋。」跟住飾演大佬B嘅黃貫中話:「聽日封番封老毛,以後跟我搵食啦。」預告片就由呢兩句對白開始。第一個Shot望落已經有少少搞笑,唔知點解,硬係覺得黃貫中個帶帽Look,似喺菲律賓曬緊太陽嘅退休人士多過似黑社會大佬;相反,何韻詩飾演嘅十三妹Jel個All-back頭,就入型入格得多嘞,其他閒角如詹瑞文飾演嘅口水詹同阿Bob飾演嘅肥佬黎,睇嚟都係過場搞笑居多。翻睇咗條片三次,我都仲係有一個疑問,因為條片去得太快睇唔清楚,究竟喺浴池掩住巨奶全裸上水嗰個係唔係胡然?定係茄喱啡?唔得,為解開呢個謎題,我決定入戲院睇一次。