主頁, 動漫資訊, 潮玩新聞 — 05/12/2012 at 7:18 pm

奉有機網諭:還祥焜人情相機!

by

祥焜望住滔滔流水,一臉無奈。

一向好鍾意祥焜,有型有格好Outstanding,淨係大熱天時都堅持著皮褸鐵鏈尖釘鞋,已經值得對佢令眼相看。佢畫公仔靚故事有內涵,估到,夾Band夠Rock夠勞嘈,都估到,係估唔到佢連結婚都可以上報紙咁盞鬼啫。
話說今日生果日報報導林祥焜喺中環擺喜酒,同拍拖超過十嘅女友Zola結束愛情長跑,原本Everything very very ok,點知婚宴散場佢駕車返西灣河太富街新居嗰陣,居然咁好彩撞正爆水管,水管爆裂,路面凹陷,食水瘋狂流出,將林祥焜剛剛擺晒落車嘅人情利是、相機、親友致送嘅禮物統統沖到九里遠。林祥焜身手算好,即時執起一袋禮服,然後聯同兩名兄弟涉水追趕失物;可惜水流太猛,追都追唔切,搵咗兩粒鐘先搵番部份失物,報導話價值九千大元嘅相機同禮物已經蹤影全無,祥焜仲懷疑附近街坊趁水打劫添。

呢段新聞都佔報紙幾大篇幅,圖文並茂,圖中所見祥焜挨喺馬路欄杆旁邊,一臉無奈。又係煩嘅,大好日子搞壇咁嘅嘢,畀著我都愁,唔見錢事小,唔見相機事大,結婚一生人得一次,唔見晒啲結婚相真係喊得一句句。死啦,本周六仲約咗祥焜做訪問添,家陣佢都唔知仲有無心情接受訪問,希望佢唔好Sad啦,有我哋廣大「有機網」Fans呵番你,凡事向好方面諗──爆水管,咪即係水為財囉,預示你結完婚豬籠入水,賺個盤滿缽滿呀。同時借少少位呼籲,邊個執到祥焜相機同人情,唔該速速物歸原主呀!路不拾遺呀!人間有情呀!路不拾遺呀!人間有情呀!

資源來源:http://hk.dv.nextmedia.com/actionnews/hit/20121205/18091222/20005976