fbpx
主頁, 動漫資訊, 潮玩新聞 — 30/11/2012 at 2:00 pm

《古惑仔》榮登全球最長篇連環圖

by

呢張海報,究竟想表達啲乜呢?

唔經唔覺,原來我養咗牛佬差唔多二十年,《古惑仔》喺1992年創刊,去到家陣2012年出版到第1561期,成為全球最長篇連環圖,你都咪話唔厲害。

撇除初頭百零期無追睇,之後一睇就追睇到依家,烏鴉判變、大頭仔陣亡、火石州之役耀揚斬頭、太子過檔分部、蔣天生親手殺死蔣天養、細細粒一槍爆頭、阿夜一刀貫腹而死、車寶山慘被剮成肉泥、伊健寧死不屈、八大壯士死其六、大東俾韓賓射殺、山雞俾人掟落樓跌死……嘩,個腦一Run,幕幕精采又浮現番晒出黎,可以比上官小寶本《李小龍》更長壽,真係不得不畀個Like牛佬。

牛佬喺今期《古惑仔》致詞話:「『前無古人,後無來者』呢兩句話,《古惑仔》當之無愧!因為我堅信,之後亦好難有人做出呢個『創舉』!而最奇異係《古惑仔》並未停低腳步,而係繼續前進!踏入一段『完全陌生』嘅旅程…..。感覺係──一隻小船,向著茫茫然嘅大海進發一樣!幾時淹沒,幾時翻過一浪又一浪,無人會清楚!」佢仲喺周記話有諗過出兩日刊,如果真係一個禮拜出三期《古惑仔》的話,其他人唔知,但我第一個撐。 讚完,有少少嘢要彈,做乜隨今期奉送嗰張「星光大道陳浩南」海報咁「唔知想點」咁嘅?得罪講,成張海報唔知焦點喺邊,亦唔知想表達啲乜,連陳浩南個樣都畫得唔清唔楚,牛佬究竟想點呢?呢次真係願聞其詳嘞。

第1561期《古惑仔》$15