fbpx
主頁, 動漫資訊, 潮玩新聞 — 28/11/2012 at 2:00 pm

李志清活化舊中環街市

by

活化中環舊街市外牆,經過記得望多兩眼。

人走入畫,莫辨真假,好盞鬼。

李志清越老越型仔,好返老還童Feel。

李志清又有新搞作,今次仲要係大Project添,佢聯同《十三點》作者李惠珍同黃照達一齊活化中環舊街市,替街市四面外牆畫大規模牆畫,離九里遠都望得到,非常養眼,中環人有眼福咯。

舊街市同期舉行「漫遊中環原稿展覽」,即係話,唔單止行經街市有畫睇,上街市二樓綠洲藝廊一樣可以欣賞大師級畫作。講番李志清今次嘅牆畫,畫風既非水墨也非油畫,亦唔係《射鵰英雄傳》嗰類我哋見慣見熟嘅漫畫公仔,而係加咗少少修飾嘅速寫畫作,十幾幅中環街景,放大到差唔多原物大小,日頭來去匆匆,經過嘅路人就好似走咗入畫咁,如果挨近外牆企定定唔郁,真人同畫中人真係1好難分,人同畫共融得天衣無縫,好正,我畀十萬個Like。 如果有時間上二樓睇展覽,睇三大本地漫畫家畫作之餘,不妨同自己玩個小遊戲,李志清喺其中一條柱上面畫咗個郭靖親筆畫,又睇吓自己對夠唔夠眼利,搵唔搵到出黎?暫時所知,呢四面大型牆畫會擺放兩年,龍友以後又多個地方朝聖地嘞。

地點:德輔道中80號中環街市二樓綠州藝廊

展出者:李惠珍、李志清、黃照達

展覽開幕,齊齊排影靚相。

考眼力,試吓搵搵李志清喺邊條柱上面畫咗個親筆畫?