李志清又有新搞作，今次仲要係大Project添，佢聯同《十三點》作者李惠珍同黃照達一齊活化中環舊街市，替街市四面外牆畫大規模牆畫，離九里遠都望得到，非常養眼，中環人有眼福咯。
舊街市同期舉行「漫遊中環原稿展覽」，即係話，唔單止行經街市有畫睇，上街市二樓綠洲藝廊一樣可以欣賞大師級畫作。講番李志清今次嘅牆畫，畫風既非水墨也非油畫，亦唔係《射鵰英雄傳》嗰類我哋見慣見熟嘅漫畫公仔，而係加咗少少修飾嘅速寫畫作，十幾幅中環街景，放大到差唔多原物大小，日頭來去匆匆，經過嘅路人就好似走咗入畫咁，如果挨近外牆企定定唔郁，真人同畫中人真係1好難分，人同畫共融得天衣無縫，好正，我畀十萬個Like。 如果有時間上二樓睇展覽，睇三大本地漫畫家畫作之餘，不妨同自己玩個小遊戲，李志清喺其中一條柱上面畫咗個郭靖親筆畫，又睇吓自己對夠唔夠眼利，搵唔搵到出黎？暫時所知，呢四面大型牆畫會擺放兩年，龍友以後又多個地方朝聖地嘞。
地點：德輔道中80號中環街市二樓綠州藝廊
展出者：李惠珍、李志清、黃照達
