fbpx
主頁, 動漫資訊, 潮玩新聞 — 27/11/2012 at 11:00 am

《鬼王天弓傳》Outtake當內文,佩服!

by

《鬼王天弓傳》$38

擒晚經過報攤,無端端見到本《鬼王天弓傳》,海洋二號出版,問老闆娘乜料,佢話:「發行掟過嚟,我都唔知乜料,不過幾好賣。」每本$38都咁好賣?拎上手,見都OK墜手,又忍唔住買番本Look Look。

封面寫明,構圖與故事由海洋二號負責、監制Dicky Lee、繪畫戴慶賢。戴慶賢係乜水?Sorry,真係唔識,但全書彩稿好靚,分鏡亦唔錯,無話格格都一個人頭講一句對白,尤其Like主角天弓嘅造型設定,畫得好型,好Raw,好有男兒氣慨。個人認為,肥良躉未必認同,純個人意見,如果旁白唔好咁重「肥良味」,少減啲「之來之去」、「而來而去」、「吧來吧去」同「矣來矣去」,唔好咁多「便就」、「那便」、「給我」的話,成個故仔會發展得更加流暢。 故仔好睇,專欄部份更加好睇,先有Dicky講到明《鬼王天弓傳》原本有三部,每部一百頁,但因為驚蝕,所以濃縮到依家得番三十五頁硬生生完結,實話實說,完全翻開肚皮俾人睇,搞笑!

肥良專欄大把料爆:「很久沒和大家說話。在這段時間,我便要面對預計『失去漫畫』後的半年抑鬱。已過了三個月,再捱多三個月我便可以重新投入那能令自己開心的創作工作。」字裡行間隱隱然賣定廣告,三個月後佢會東山再起咁話,不過講到最搞笑都係肥良自嘲:「不知大家記不記得口碑好到爆燈的《海洋瘋狂》後,我畫咗本《粗口俠》的東西。而回說《粗口俠》回書後,竟有些錢賺回來,吹脹!」哈,呢本喺網上討論區俾人鬧到爆嘅低能之作居然有錢賺,唉,我除咗講一句:「世界變咯!」都唔知有乜好講。 我最佩服嘅,係《鬼王天弓傳》居然加插咗八大頁Outtake,Outtake,即係被剪片段,話明被剪片段,就唔應該出現啦,係肥良先夠膽死當內文咁登埋出嚟,仲煞有介事介釋點解唔用呢啲被剪片段。我份人比較小心眼,話就話全書五十頁,但有Total十五頁係專欄同Outtake,拎上手係厚咗呀,所以咪敢膽死賣$38囉,抵唔抵睇?你話呢?真心衷心誠心勸諭肥良,正正經經出番本$15薄裝漫畫仲好啦,畫得好實有讀者捧場,搞埋呢啲老土呃水嘢把鬼咩?

Outtake當內文,想點先?