主頁, 動漫資訊, 潮玩新聞 — 30/08/2016 at 9:00 am

抵死!撻書十年終於斷正!賀Goal Club老闆成功捉賊!

by

10

行親旺角,我都會慣性地去信和中心漫畫店「至Goal Club」,幫襯吓擺番低三五十蚊,老闆好好人,有問有答有禮貌,但估唔到好人無好報,俾同一個賊仔撻佢嘢撻足十年。呢個賊仔上個月先衰過喺老闆手,但因為無人贓並獲,所以焗住放人,而今次賊仔撻《復刻龍虎門》同《西遊》終於斷正,老闆喺面書交代話:「條仆街又來偷書,比隔籬舖幫手捉到佢!報咗警!今次好彩隔籬舖四眼哥哥發現佢偷嘢!見義勇為,幫手捉住佢!聽差人講,閉路電視拍到佢偷嘢過程!今次佢應該斷正!好囉!今次終於解開多年鬱結!因為呢條仆街應該喺我鋪頭偷咗十幾年嘢!大大話話應該都有幾千銀!」留言一出,唔只我戥老闆高興,好多熟客都留言同慶賀──Eric Chow:「恭喜!天也話:係時候收你條十幾年粉腸了!」、莫問:「偷書?仲要咁多年?呢啲打壞打斷佢對手就啱嘞……」、David Lam:「打九佢。」等等等等。唉,查實細個阿媽已經有教,撻嘢係唔啱嘅,撻得第一次就總有第二次,撻得第二次就總有第三次,會俾差人叔叔拉架。上多山多終遇虎,呢次真係抵個賊仔死咯!

至Goal Club(旺角信和中心商場第三層231舖/2770 5502)

資料來源:https://www.facebook.com/g.goalclub/photos/a.1426310840925722.1073741827.1425445054345634/1844988245724644/?type=3&theater

人贓並獲,賊仔今次斷到應一應,查實老闆算厚道,俾我?連格仔都唔打,等所有人都認得佢個衰樣,撻嘢吖拿!
人贓並獲,賊仔今次斷到應一應,查實老闆算厚道,俾我?連格仔都唔打,等所有人都認得佢個衰樣,撻嘢吖拿!