fbpx
主頁, 動漫資訊, 專題熱話, 潮玩新聞 — 16/08/2016 at 9:45 pm

燈箱+畫作+餐牌+雕塑 老夫子餐館打卡可以 食物質素免問

by

Image-1 (1)

我唔算好迷王澤,但《老夫子》係細個唯一可以大模斯樣喺屋企拎出嚟睇嘅港漫,所以知道太子開咗間「老夫子餐館」,心諗一定要去打卡。上周日專程去捧場,時為下畫三點幾,都已經新開張咗個幾禮拜,估唔到都仲要排隊,排廿分鐘有檯,不過我哋三人行,要同三唔識七嘅人搭檯,唔緊要,影相要緊。影完相,食完嘢,做個總結,裝修我畀滿分,但食物質素就……一般過一般喇。

一心打卡嘅朋友應該好開心,作為一間主題餐廳,老夫子餐館嘅裝修絕對合格有餘,幾乎每一個角落都係影相位。行樓梯撐上二樓,先見到用N咁多個《老夫子》封面拼成嘅兩大幅玻璃牆,密密麻麻排埋一齊,幾有氣勢吓。到企喺門口等位,又可以同大大個大番薯、老夫子塑像合照,由於有好多人等位,想Selfie要排隊,之後瀏覽飾櫃,有老夫子環保購物袋、Lego、搪膠雕塑等精品選購,慢慢睇慢慢磨,時間好快過,包唔會等位等到發脾氣,至於精品價錢貴唔貴,就真係見仁見智嘞。
好喇,有位喇,入場,耷低頭,梳化凳要影,卡位要影,因為全部都有老夫子圖案;抬起頭,牆壁同柱身又見到老夫子身影,大小畫作、心心燈箱,真係舉機都舉到手軟。未止,連行入洗手間條走廊都有黑白老夫子,呢個都係影相位。攰未?未攰就唔該岳高頭,連天花板都有大大小小老夫子圖案燈箱,又踎又挨,想攞個最佳最Wide角度影相,都幾有難度。至於個車廂造型卡位,就更加係必搶靚位。
好喇,Order時間到,個餐牌直頭要讚,整到成本畫集咁,王澤迷應該好想據為己有。食物選擇好多,統統用《老夫子》裡面嘅四字成語命名,係幾過癮嘅,不過食物同食物名其實唔多Match,例子有「耐人尋味」,原來係瑞士汁燒乳鴿,乳鴿有幾耐人尋味呢?兩者有乜關係呢?根本大纜都扯唔埋,純粹搞噱頭,有啲夾硬囉。食物質素方面,Sorry,真心話,好麻麻,唔好味仲要偏貴,一個葡國雞飯賣$108!除咗份量夠大,我諗唔到有乜優點。我哋點咗肉醬意粉、咖喱雞飯同咖喱豬扒飯,咖喱豬扒飯勉強算合格,肉醬意粉就肉醬還肉醬意粉還意粉,唔多覺有焗過,咖喱雞飯啲飯係硬嘅,汁稀無咖喱味,最攞命係啲雞塊,我懷疑廚房係唔識斬雞嘅,劈到一啱一忽,咬一件,要吐八至十粒骨塊,好易啃親。飲品「道高一尺」,說穿了不過係雪碧溝涼粉加多兩三片罐頭菠蘿,但杯面放咗個大大棉花糖球,要客人自己倒雪碧入杯淋溶個棉花球,之後先可以慢慢啜,算有啲新意咁喇。
一句到尾,有鋪打卡癮嘅人值得朝聖…..我呢,就應該只此一次,夠皮咯。

老夫子餐館
地址:太子彌敦道777號安寶樓1/F

門口對出有個「老夫子餐館」燈箱,大紅托底,好搶眼。

門口對出有個「老夫子餐館」燈箱,大紅托底,好搶眼。

 

老夫子以一身廚師打扮出場,人人爭住同佢影相。

老夫子以一身廚師打扮出場,人人爭住同佢影相。

 

老夫子搪膠雕塑,分1962年紅色、1968年藍色同1985年黑色三個造型,各$1500。

老夫子搪膠雕塑,分1962年紅色、1968年藍色同1985年黑色三個造型,各$1500。

 

用《老夫子》封面做玻璃牆,半透光,好鬼有型。

用《老夫子》封面做玻璃牆,半透光,好鬼有型。

 

餐牌靚到似本畫集,食物用《老夫子》四字成語命名,不過食物名字同成語唔多夾。

餐牌靚到似本畫集,食物用《老夫子》四字成語命名,不過食物名字同成語唔多夾。

 

我好鍾意呢張凳,圖案人物眾多,有排聞。

我好鍾意呢張凳,圖案人物眾多,有排聞。

 

燈箱裡,老夫子同陳小姐結婚,恭喜恭喜。

燈箱裡,老夫子同陳小姐結婚,恭喜恭喜。

 

走入洗手間嘅走廊,又一影相位。

走入洗手間嘅走廊,又一影相位。

 

呢幅畫作係真跡定復印品?問過侍應,佢哋話唔知。

呢幅畫作係真跡定復印品?問過侍應,佢哋話唔知。

 

牆身有《老夫子》主角剪影浮雕。

牆身有《老夫子》主角剪影浮雕。

 

汽車造型卡位,人人都想坐。

汽車造型卡位,人人都想坐。

 

又一老夫子燈箱。

又一老夫子燈箱。

 

用盡每一吋地方,連天花板都有老夫子蹤影,有排你影相。

用盡每一吋地方,連天花板都有老夫子蹤影,有排你影相。

 

呢條樓梯係咪好有氣勢先?

呢條樓梯係咪好有氣勢先?

 

呢杯飲品叫「道高一呎」,有得飲有得玩。

呢杯飲品叫「道高一呎」,有得飲有得玩。

想即時睇到更多日本文化、ACG、網絡最新資訊,請即加入facebook!
https://www.facebook.com/GameoverHK