fbpx
主頁, 動漫資訊, 潮玩新聞 — 02/08/2016 at 9:15 pm

《春秋猛士》創刊 畫功中上48頁好抵睇

by

IMG_6238

呢排比較忙,剛剛先有時間坐定定欣賞黃玉郎最新作《春秋猛士》。先講封面,唔係話唔靚,不過書名連字款都一樣,差啲以為自己買錯死極唔斷氣嘅《春秋戰雄》,感覺唔多夠搶,唔多似創刊號。再講畫功,個人感覺算中上,起碼主角赤破、赤天、虎月兒同虎牙嘅面相好順眼,唔見有《新著龍虎門》嘅小甜甜眼,頭髮睇得出有心機填好多。再講故事,有頭有尾有中間,節奏明快,令讀者好快入到局,赤破無端端一身疤痕發晒光、燕桓侯夢見青龍猛士呢兩條伏線都OK吸引吓。要挑剔嘅地方都唔係無,成本書啲文字說明都好累贅吓,一味架床疊屋有咁長拖咁長,慌死大家太快睇完本書咁,第五頁文字說明仲誤植「燕桓侯」為「齊桓侯」添。總括嚟講,我會畀85+5分,加嗰5分,係因為全書48頁,實在抵睇,希望《春秋猛士》唔好虎頭蛇尾喇。