fbpx
PS3, Xbox360, 主頁, 專題熱話, 遊戲新聞 — 16/11/2012 at 12:21 am

遊戲到手 《Hitman Absolution》剝衫換衫 鬼鼠係王道

by

知你返埋聽日放假唔願瞓啦,嚟啦!正式就聽日先出,不過今日偷跑咗啦!開機先!開場畫面幾鬼靚,老實講句,比起前兩個星期隻《刺客教條 3》,我覺得呢隻仲有新意,一來,起碼戰場係現代,二來,主角光頭Agent 47擺晒po幾有型之餘,有啲位仲好搞笑!例如可以掉啲杯呀工具呀出去引開敵人注意,搞掂一件之後又可以剝清光換佢套衫,好多場合都可以靠衣裝呃過敵人,不過我試過換咗套農夫裝,但係唔記得收埋把槍……俾人發現咯,梗係雙槍雄啦!呯呯呯呯吼吼吼吼吼!

開頭教學都係換吓武器試吓雙槍,之後就鬼鬼鼠鼠咁潛入搵目標!頭嗰幾個敵人真係好pure好ture,成日背住啲入口,咁駛鬼搵你哋做守衛咩?慢行過去守衛後面就可以一嘢KO佢,或者推佢落山崖,如果有刀喺手仲可以見血封喉。好喇,試過幾款玩敵方法之後,開始熱鬧喇,人多喇,咁呢個時候衝出去……都唔好放棄,未必死梗o架!你可以用X掣舉高雙手扮投降,之後趁天真嘅敵人行近時一嘢脅持佢檔子彈,搞掂晒其他人,個人質咁好彩未死,按四方掣就可以用槍柄亨佢個頭!笑我光頭吖嗱!笑我冇頭髮吖嗱!

仲有,同你阿媽鬧你一樣,最緊要有手尾,殺完人都要有手尾,將條屍收得好啲,唔好俾其他敵人見到,換咗佢套衫,將個淨係著孖煙囱嘅人四圍拖,隻腳仲要fing fing吓……

感覺有啲似MGS加刺客教條,難度一般,Easy都好多敵人,但勝在有得用R1神奇透視眼,可以睇穿牆睇吓敵人喺邊。玩咗一陣,最開心都係換衫扮自己人,除咗搞掂敵人埋去按實個掣換裝外,有啲地方都會有衫你執,不過留意,一套衫只可以喺某地區唔受敵人注目,即著住套農夫衫就咪入廚房喇。而且,行要行得慢,有時仲要耷底頭,仲有,記得收埋把槍……斷正即啪呀。

Tags