fbpx
主頁, 動漫資訊, 潮玩新聞 — 14/11/2012 at 12:00 pm

牛佬爆粗開咪勁搞笑

by

牛佬畫公仔叻,應份,開咪都咁惹笑,Bonus!話說佢上網上電台「熱血時報」接受節目《麻甩建港聯盟》(第七集《牛佬飯局》)訪問,全程八十分鐘有講有笑,無話主持問一句佢先答得一句半句,依家先知牛佬份人原來咁搞笑。

《麻甩建港聯盟》屬現場直播節目,各人對住鏡頭即席爆肚,無紙仔,無預定題目同答案,講到邊就答到邊,話題多多加上粗口橫飛,委實聽得異常過癮。一開波,先解釋牛佬之名何來,原來牛佬自細住屋村,喊聲似牛叫,被隔籬鄰居改咗呢個花名,就沿用之今。《古惑仔》未來故事發展都有講及,不過大家可能會好Sad,因為牛佬打算同陳浩南同大飛哥重新定位,兩位大哥將會棄武從商,做大撈家唔再打生打死。仲有,你有無諗過牛佬已經無睇港漫三十年,反而鍾意睇瓊瑤小說?你又估吓佢點教人溝女?佢話:「如果條女唔鍾意你,你只有同自己講,係佢走寶!鍾意就鍾意,唔鍾意就唔鍾意,搞咁多嘢都係無用。」不過講到最搞笑,一定係佢分享嘅潛水趣事,話說佢負責帶一個叫Helen嘅學員下水,「呢個Helen,完全同Helen呢個名係兩回事,好肥,有鼻毛,仲有少少格肋底毛,因為太肥,所以加幾多鉛塊都潛唔到水……佢又肥喎,教極都唔識,我都有少少火。」唔係講笑,聽到呢個位,我真係嗤一聲笑咗出黎。有幾好笑?自己聽聽啦。

網址:http://www.passiontimes.hk