fbpx
主頁, 人物專訪, 專題熱話 — 08/04/2012 at 4:11 am

6A凌曉雨 饅頭:「我鍾意打機多啲。」

by

httpvh://youtu.be/TPnNPY0aChw

呢個同三島鼎爺玩完Cosplay即成為焦點嘅Cosplayer叫饅頭,高登仔起其底,大發現原來係曾經上報紙頭版嘅AL6A女學生。講咗重點先,「我冇拍拖呀,都未拍過拖。」正呀喂!相對冇咁重要嘅係:「其實我唔係好鍾意玩Cosplay。」

httpvh://www.youtube.com/watch?v=FP7SjxdxQOc

令人葡萄的女同學

點解唔鍾意玩Cosplay,但又扮凌曉雨扮到連《街霸 X 鐵拳》製作人小野義德都話未見過咁似。「其實我係鍾意打機多啲,打機見到啲好鍾意嘅角色,先會有想cosplay嘅念頭。」原來饅頭自PS年代已成為機迷:「嗰陣小學同細佬買咗部PS打機,其實都未算好鍾意。之後又玩吓online game,再之後打psp先開始越打越多。」饅頭現在大學讀法律,AL攞6A喺佢口中唔係難事:「其實係考試前先讀,上堂有聽書咪得囉。」讀書時難免遇到呢類唔係好讀書但好好成績嘅同學,係,我認,如果坐佢隔籬位,我應該會好葡萄好想捏爆佢個頭。

愛玩追女game

近年都係PSP忠實fans,「其實我咩game都玩o架!」估唔到係最沉迷「芒亨」,「梗係同人圍埋一齊玩先開心!我o依家放學有時都會同啲同學去麥記打機。」仲有咩game特別喜歡?更加出人意表:「我鍾意啲追女仔game囉。睇吓啲故事都幾得意。」由於訪問喺SCEH辦公室進行,《街霸 X 鐵拳》開到大大聲,所以問到佢有冇玩《Love plus》時,佢好醒目地話:「講NDS遊戲唔係咁好嘅。」

客串過港產《街霸 X 鐵拳》段片之後,饅頭仲話o依家練緊用泰王,想睇佢嘅身手,就記得睇埋我哋段片,出昇出波冇問題,技術則有待改進。

愛看的漫畫是……

「我都唔出街嘅。」喺佢口中形容嘅自己相當「宅」:「我一個月先會出一次信和,一次過買晒想睇嘅漫畫返嚟!」放假多數唔出街,「喺屋企好多嘢做o架,打機睇漫畫、動畫。」講到現時最愛嘅漫畫,「《One Piece》啦,我覺得路飛好得意。」仲有呢?開始吞吞吐吐:「我唔記得喇。」唔,尷尷尬尬咁款,唔通係BL漫!「唔好問啦!」噢噢噢噢!

未算性感
講番Cosplay,睇佢之前扮過嘅《Dead or Alive》「霞」,wow,好sexy,「都唔係好性感啫,都三點不露……」驚喜答案真係越問越有。下個扮嘅角色會係咩?「我唔知呀……睇吓鍾意咩角色囉。」點解你唔鍾意玩《DOA沙灘排球》呢?我希望,佢嚟緊會鍾意玩《Lollipop Chainsaw》,嚟啦!好多造型o架!

後記
呢位女同學,連把聲都好有一陣可愛萌味。訪問期間大部份問題都用呢把聲答:「我唔知呀。」「唔好問啦。」吞吞吐吐我估應該係怕媽咪鬧。最後,中年攝影師兼拍片哥哥,係忍唔住話要回到那些年同佢對戰一舖《街霸 X 鐵拳》,打機嗰陣,最high最開心,Yeah!年齡無界限,音樂無疆界呀!