主頁, 專題熱話, 遊戲新聞 — 08/11/2012 at 7:24 pm

2012亞洲遊戲展 末世代言人是誰?

by

年年聖誕節附近都會喺灣仔會展搞嘅「亞洲遊戲展」又準備開波,今次SCEH懶神秘,啱啱今日(8日)就向各大傳媒發咗張代言人相,不過淨係睇到個鼻同大大隻隻咁款。上年Twins前年Edison我本人都麻麻哋,睇見仲有少少唔開胃,今年你哋估唔估到係邊個?古天樂?謝霆鋒?余文樂?鄭伊健?草蜢?軟硬?定一話係近排喺高登爆紅,有陰謀嘅鄭子誠……?以下係歷年遊戲展代言回顧,入嚟睇吓有冇路捉先啦!入Playstation HK facebook留言估中,仲有機會得到遊戲展入場券兩張(50名),認真物輕情義重呀!

2002年 CG神奇女俠鄭秀文
香港舉行首次亞洲遊戲展,係第一個以電玩為主題嘅展覽,對於當時打機緊要過食飯嘅我嚟講,點能夠唔湊熱鬧? 不過o依家睇番第一屆代言人鄭秀文嘅CG神奇女俠造型,就真係覺得幾低科技。當年嘅主題曲就係〈神奇女俠〉喇。

2003年 陳慧琳Kelly shake your body
可能第一年引到我呢啲無知機迷入場,第二屆搞得仲大型啲,今年輪到當年嘅舞后陳慧琳Kelly shake your body 。主題曲係〈伶仃〉,至於點解係女賽車手?因為當年請得GT之父山內一典到港之餘,仲喺《GT 4》加入香港彌敦道賽道,另外亦開始有中文版遊戲登場,好威威!

2004 唯一冧莊又係陳慧琳
陳慧琳冧莊做多年代言,亦係直到今年為止唯一一個做過兩屆代言嘅女藝人,可想而知當年Kelly幾咁花花宇宙。 今次佢就扮中古女武士,主題曲係〈情人戰〉,以遊戲《Tales of Rebirth》為主題。

2005 古巨基隻手變咗支炮
呢年亞洲遊戲展無啦啦暨咗亞洲數碼娛樂展,都幾得意,有埋數碼產品,個場咪多嘢啲囉。嗰年由古巨基做大使, 以「銀河獵人」造型主唱主題曲〈明星〉。

 

2006 郭富城揸電單車
呢年係敦富城做遊戲展大使,仲以「颷極風之子」嘅超時空賽車手造型主唱主題曲〈風之子〉,歌曲MV以PS3遊戲 《跑車浪漫旅HD》為主題,GT之父山內一典先生又有嚟。

2007 何韻詩 鄭秀文打孖嚟
呢屆嘅代言人係何韻詩同鄭秀文,兩個人合唱主題曲〈劍雪〉,化身成為「星際女戰士」。

2008 楊千嬅愛上萬能俠
遊戲展大使係楊千嬅,主題曲係以PS3遊戲《小小大星球(LittleBigPlanet)》為主題嘅《當女飛俠愛上萬能俠》。

2009 容祖兒做金屬女郎
今屆係容祖兒,佢化身「太空金屬女郎」唱出主題曲〈桃色冒險〉,我懷疑之後一系列百老匯廣告都係被呢壇嘢啟 發嘅。

2010 陳冠希復出
係陳冠希繼淫照事件後,首次正式復出嘅活動,佢唱嗰首主題曲〈Man in the mirror〉,都唔知佢唱乜。

2011 Twins十周年
遊戲展10周年記念,撞正Twins又係10周年,佢哋首主題曲係〈上陣〉,個MV中有Sackboy出場。

2012 ????
到底代言人係邊個?

https://www.facebook.com/PlayStationHK