Wii U, 主頁, 專題熱話, 遊戲新聞 — 07/11/2012 at 10:33 pm

新片速報 任天堂Wii U發佈會 社長玩開箱

by

啱啱頭先香港時間7點嘅任天堂網上發佈會,講明係介紹Wii U,你以為又係嗰啲睇過嘅嘢?唔係喎,社長岩田聰講講吓突然戴對白手套,你以為佢想變魔術?原來隆重其事玩開箱,逐樣拆出嚟,之後就介紹Wii U嘅網絡功能!一開始就去到一個好多人嘅地方,你可以理解做冇任何背景嘅PS Home類似嘅嘢,叫「Mii WaraWara Plaza」,可以喺度傾計,亦都可以睇到其他人玩緊咩遊戲。之後就講今次Wii U慢一幾拍加入User Account制度,闊佬嘅係一部機可以登記12個使用者!條片長成粒鐘,睇完你就係Wii U專家喇。

每個使用者ID都會有獨立嘅個人資料、Save資料同瀏覽器bookmark等等,當然仲有類似獎盃、成就功能嘅記錄,而且一部機買咗一樣下載內容,就個個使用者可以用,雖然佢講到好威水咁,但其實呢個本身應該係理所當然、天經地義事……另外新主機亦都唔會再friend code,同埋新增Wii U Chat視象通話,佢仲即時搵美國任天堂總裁Reggie Fils-Aime傾個計畫吓公仔,BL味好濃……不過,呢個用tablet都做到,又係你呀,多嚿魚呀!咁又唔係嘅,因為之前任天堂都講過,傾計同時你仲可以載入你玩緊嘅遊戲畫面,同人分享之餘,仲可以問朋友呢關點過,又幾方便!另外,片尾亦有《New Super Mario Bro. U》嘅製作人訪問。

最後,唔係好關香港玩家事,任天堂會同日本線上卡拉OK XING合作推出唱K服務。

 

Tags