fbpx
PS3, Wii, Xbox360, 主頁, 遊戲新聞 — 04/11/2012 at 8:47 pm

網上熱傳:PS2宣佈停產 一個時代的終結 ?

by

今日網上有消息流出,話PS2正式停產,大批中港機迷都喺網上留言懷緬。呢部2000年3月推出嘅遊戲機,眨眼已經12歲,推出超過10,800款遊戲,全球賣出超過1.5億部,堪稱PlayStation嘅黃金10年。諗起PS2,你又會諗起那些年嘅邊款遊戲呢?不過,呢單消息暫時未有官方證實,消息來源係一間日本遊戲店嘅Twitter留言,可信度一般,加上PS2喺發展中國家嘅銷量依然高企。不過趁呢單消息,大家不妨都拎返部機出嚟,開著佢重溫吓美好時光啦。

 

有圖有真相,你有無入去留言?

 

回顧一下,PS2於99年3月先喺日本發佈,緊接00年3月發售,當年搭載DVD,有得睇碟兼打機,走得好前,筆者都係因為咁儲起零用錢買咗一部。記得當年同步有SEGA部Dreamcast遊戲機,因為PS2大作夠多,加上有DVD功能,容量達4.7或8.5GB,最終成功擊退SEGA,令對方完全退出主機市場。隨後有微軟Xbox同任天堂GameCube推出,可惜都動搖唔倒PS2嘅江湖地位。

薄版PS2出過改良版,仲有紅色及白色,簡約設計真係靚絕,同而家嘅PS3差得遠。

 

經典嘅Dreamcast(左)同GameCube(右)你掉咗未?

 

記得SONY話過,主機壽命10年,不過今時今日,好多發展中國家仲會購買PS2,所以SONY提及過會一直推出直至市場無需求。另外,PS2都破咗遊戲界五個紀錄,分別係銷售時間最長、最暢銷、遊戲最多、最薄遊戲機、公司支持時間最長。

今時今日PS3已經遠離PS2嘅黃金時代,除咗Xbox360同埋任天堂Wii(甚至即將推出嘅WiiU)夾擊,仲有遊戲業最大敵人 ─ 智能手機,所以話,呢部PS2真係機迷嘅集體回憶,點都要儲起。

那些年嘅經典遊戲,有邊款你有玩過?