fbpx
主頁, 動漫資訊, 專題熱話, 潮玩新聞 — 04/11/2012 at 7:09 am

小忌廉MV首播 Evelyn現場唱 餐廳開幕有片睇

by

 

 

日和號x Creamy Mani喺11月1號,呢個大陸人稱「小光棍日」開幕!不過要到3號先俾傳媒採訪……其實好多Fans喺早幾日,睇見我哋段速報News已經衝咗落去,可能仲早睇過小妹進場;不過記招多咗原作者高田明美壓場,仲要喺只招呼傳媒,唔俾其他「閒雜人等」入場,我知大家好想知裏面發生乜嘢事,即場手稿、新版小忌廉/小忌廉甜點小食現真身……最重要係有新3D構圖嘅小忌廉MV首度在香港公開,睇完我真係好感動,從此餐廳名我只會叫小忌廉餐廳,其實,本來就應該咁做!

如果以前去過日和號,應該都知佢嘅前身已經係一個個JR車箱設計;入到去,原傢俬設計無乜點改動,不過車箱、車卡轉晒小忌廉Pattern加海報,對Die Hard Fans嚟講,可能已經好感覺,不過……真心話係有啲流,點解唔加多個1:1 Figure畀人影吓相先,好彩後來喺舞台位發現Poster同紙板公仔,只算係有一個小交代!

 

 

新小忌廉 出年有得睇!?

講開張Poster,開初睇有啲怪,同舊電視版明顯有啲唔同,起初仲以為高田老師畫風變咗,不過喺訪問期間,突然爆出小忌廉出年係30週年,可能會有新舉動,經小妹多番追問,佢只係話唔方便回答,應該要等年底前嘅進一步公布……咁呢個唔同版嘅小忌廉同小桃,會唔會喺新一輯小忌廉嘅新造形?呢個問題,我真係覺得幾呼之欲出!

如果你問新舊版有乜唔同,我會答你,小桃變化不大,不過硬係覺得佢卡娃兒啲,至於小忌廉,我睇原兩相,唔知點解硬係覺得舊版本妖邪啲,新版有少少Baby Fat + Baby Face,好似後生咗好多!

 

3D小忌廉新歌MV!?

不過講到最後大露底嘅,都係一段3、4分鐘,全3D構圖製作嘅小忌廉X小桃嘅MV,高田老師喺開畫時講明,係剛剛做起!喺香港作首度播放!我只係想問一句,無端端做一段3D片?你估真係錢多?再追問出年係咪有大動作,答案唔係否定,只係笑笑口話等高層進一步公佈,或者會在年底,我嗰刻真係好感動!

雖然我哋已經拍底咗段片畀大家先睹為快,不過由於解像度問題,大家未必睇得真切,請容小妹作小小旁述!首先畫面投影上百吋,完全冇格跡象,所以絕對係HD製作,至於佢個三維構圖都好特別,我只可以用非常順滑形容,完全冇起角,感覺可以係以一塊塊圓滑的拼圖合拼而成!如果想睇得真啲,可以留意頭髮位,你會見到一塊塊頭髮片覆叠而成,至於完全唔覺得生硬嘅原因,係喺小忌廉跳舞時,每一塊頭髮片都會自動伸展同郁動,而且相互間仲有連動,不過更過癮係全部以半透明顏色着「墨」,重叠間又有點中國水墨畫般漸增變色,但又可以透過髮絲,再看到眉眼,雖然現場無作進一步解釋,估計可能係新技術,真係令人好期待!

如果要彈,我發覺小桃動作非常生動可愛,相對小忌廉由於手腳放長了,但竟然用相同節奏郁動,感覺明顯變得有點生硬,所以雖然完成度相當高,但話呢段係試片,都唔係不無原因!

 

高田老師即場手繪稿

至於全個記者會高潮位,應該係高田老師嘅即場揮毫!繪畫了一個小忌廉公仔!據稱筆同畫架都係高田老師自帶用品,當畫完出嚟時,好多同場記者心裏同時響起了一句:「係咪會抽獎架!」不過答案係放咗喺度無郁過,估計有可能成為食店鎮店之寶,所以大家要去潮聖,又多咗一個理由!

真跡手稿,就小妹現場所見,仲分別由香港兩間大報紙記者取得,雖然令人恨得牙痒痒,不過俾我見到一段小插曲!第一樣係高田老師一定要在手繪畫上,寫明送贈傳媒公司名稱,另一樣就係佢一畫完,唔係即刻送俾人,佢仲會用佢部私伙iPad影張相做紀錄,日本漫畫家對自己智識產權產品保護意識真係非常之高!

至於全個記招嘅反高潮,我覺得應該係由蔡穎恩扮小忌廉出場加Live版唱廣東話版《我係小忌廉》,係!我認Evelyn係靚女,但真係唔似小忌廉囉!再加上佢件衫,好似攞旺角花墟包玫瑰啲喱士做裙同衫嘅圍邊,再加佢一頭亂髮,我覺得佢似癲咗多啲囉!正所謂拳怕少壯,反而由0靚模扮嘅小桃,反而有啲睇頭!佢叫PiPi,件衫仲要由佢自己DIY五、六個鐘所做,小妹自知相技一般,影得佢唔係好靚,不過現場真人睇,真係可愛非常,我會力說編輯部搵佢拍輯私影,等大家睇佢最靚一面!

 

只有甜品 味道一般般

日和號講得係香港首間以Crossover主題為概念嘅餐廳,仲要係攞正牌嗰隻,真係無理由唔試吓味,等小妹一嘗食版記者滋味!其實日和號本身係一間日式料理餐廳,甚麼魚生、壽司、拉麵乜都有,不過如果你想食小忌廉專用餐,現時只有4款,而且全部仲要係甜品,據知係高田老師特別要求,原因好簡單,由於小忌廉咁Sweet,所以只有甜品先襯得佢起,聽落大家可能覺得搞笑,不過呢個正正係實情!

暫時食品只有兩樣,分別係最貼漫畫主題嘅香蕉士多啤梨Pancake同藍莓芝士蛋糕,兩樣食品都以$68/set推出,可以跟一杯Starry Grape Soda或Special Coffee,大家留意,全部甜品都係經過高田老師特別監修!無論從味道、到用料、到用色都經過小心計劃,講個簡單事例,個Pancake用士多啤梨味、粉紅色鮮忌廉,就係因為高田老師熱愛粉紅色,同埋佢想成個餐感覺Fancy啲,又例如兩樣食品的小忌廉朱古力牌,同小桃咖啡杯面的小桃公仔,都係高田老師為餐廳餐食的美觀,而特別親手設計!所以食的唔止係味道,當中仲有一層心意;不過如果你問我餐食嘅味道……雖然吃着時,的確心存感動,不過味道,小妹唔做違心事,我只可以說係緊緊合格之流,唔會有太大驚喜。

 

 

贈品慢慢出 印花+錢買

好喇!最後大家最關心嘅,就係餐廳贈品,暫知分別有襟章、Tote Bag、賀卡、A4 Folder同貼紙,大家係味樣樣都想要呢?但對唔住,暫時只有賀卡推出應市,而且仲要係集齊5個餐食印花+$40,或10個印花+$30先換到,至於其他產品,暫時未有明確推出時間表,不過杯墊係跟飲品出嘅,大家唔使加錢就可以得手;不過大家留意!小忌廉主題只係會玩到明年2月1號,所以有換就襯快手,之後將會轉主題,有可能是其他日本動漫,不過我收到風,大有機會是日本某大樂隊組合做主題,如果你樣樣啱,你個錢包相信要被吸乾了!

 

 

日和號x Creamy Mani
九龍灣宏照道Megabox L1005