fbpx
主頁, 動漫資訊, 潮玩新聞 — 01/11/2012 at 12:00 pm

邱瑞新漫畫版《紮職》海報曝光

by

無吹水,瑞新呢張海報係咪型到爆先?

呢期唔知點解咁多黑社會電影上演,繼王晶開拍《古惑仔之江湖新秩序》後,陳翊恆又開拍《紮職》,前者有老牌導演王晶加老牌漫畫《古惑仔》作後盾,牌面強勁;後者用新晉導演陳翊恆加自度新故事,Cast無疑削咗啲。

邊部電影可以跑出,暫時未知,但講宣傳海報靚唔靚,就肯定《紮職》贏晒,不過咪誤會,我唔係講電影製作公司嗰張官方宣傳海報喎,官方宣傳海報搵多個人都無,淨係見到陳偉霆裝香,仲要成個人Tune成紅色,唔Key大大隻《紮職》兩個字,仲以為呢套係鬼片,側邊兩句疑似口號物體就更加老土到不堪啦,甚麼「為江湖寫上句號,為情義打下火紅年代」,嘩,非常重八十年代華Dee feel! 我讚嘅,係邱瑞新幫《紮職》畫嘅漫畫版海報,成個畫面購圖好簡單,幾個主角大頭加配角半身,靠陰沉用色襯托出一眾社團中人嘅江湖味,尤其主角陳偉霆,瑞新畫到佢有六舊腹肌加紋身,惡形惡相,一洗平時嘅脂粉味娘娘腔形象,左上角嘅陳惠敏畫得勁似老叔父輩,譚耀文又畫得勁似為求上位不擇手段嘅江湖大佬。漫畫版海報暫時齋有畫未有字,喺今期680期《火武耀揚》偷步刊登,大家不妨同《古惑仔之江湖新秩序》嗰張官方宣傳海報比較一下,一睇就知龍與鳳。

《紮職》官方宣傳海報,好醜,唔知仲以為係鬼片。

 

《古惑仔之江湖新秩序》官方宣傳海報,明抄之前《古惑仔2之猛龍過江》Version,無驚喜,但穩陣。

第680期《火武耀揚》$15