Tablet, 主頁, 電腦新聞 — 30/10/2012 at 1:01 pm

Nexus 10 300ppi號稱地上最強Tablet芒

by

 

Nexus 10亦係好多人必買新機!一開嚟唔使講嘢,10.055”顯示屏,勁玩2,560×1,600(300ppi),號稱現時地上最強!而且電量都超強勁,睇片9個鐘、Standby 500個鐘,就算我穩陣波打個八折,我都覺得勁OK了,點解?我部XONY一代Tablet,放幾日就自動放電了,我真係好想換呀!

Nexus 10一如所料,係三星出品!不過今次呢部新機,好似真係好想主打影音方面,首先係機前加裝咗一對喇叭,靚玩靚聲靚畫,把聲真係咁靚?我答你……我估囉!系統都係行最新Android 4.2,不過佢好開心咁話俾大家知,同一部機可以有幾個不同User、不同Login!咁就妥喇!你知有啲Apps唔係好想俾其他人玩啦!係呀!自己人都係咁話,係好自私架!老婆你用我部機上網好喇!

另外喺Google Play方面,都有進一步增強,首先同個芒及喇叭有關,就係可買Movie同電視節目,來源係20世紀霍氏;而且佢仲同Warner Music Group合作,可以買到最新歌曲;最後係聯結Time,連InStyle, PEOPLE, TIME……等都有得買!不過大家唔好開心住,暫知11月13號機派街時,Google Play新服務會喺歐洲地區先開通,至於香港我諗要等等!

至於機價方面,有16GB同32GB兩個版本,價錢分別為$399美金及$499美金,首賣地區係美國、英國、澳洲、法國、德國、西班牙、加拿大、日本。

另外Nexus 7機價都有所調整,現在開賣中的16GB版會降價為$199美金,新加強32GB版開價為$249美金,不過個人覺得32GB/3G(HSPA+)版開價$299會更抵!