主頁, 手機新聞, 手機遊戲 — 30/10/2012 at 12:00 pm

免費手機新Game:甲蟲去咗邊?

by

 

三個骰盅,估兩隻唔同顏色嘅甲蟲,有啲難度架。

 

嚟,又嚟玩Game學英文,遊戲名字「Scarabs」,查字典,即係甲蟲咁解。點玩?好簡單架咋,即係街邊檔呃人錢嘅掩眼法遊戲,三個骰盅,是但一個盅裡面有甲蟲,三個骰盅發速移動後,你要估邊個骰盅裡面有餡,估錯即死。

呢個遊戲,令我想起《千王之王2000》,戲中,周星馳飾演老千黃師虎,李兆基飾演懲教處警官。兩人打賭,警官拎出三隻啤牌,兩隻K一隻A,冚埋極速洗勻,然後要黃師虎估邊隻牌係A,賭注好大,黃師虎贏,全年食免費煙;警官贏,每日打黃師虎一拳,打足一年,而結果,黃師虎睇通警官出老千,根本三隻啤牌都唔係A,所以胸有成竹前後估兩隻啤牌都話:「呢隻啤牌唔係A!」換言之,剩番落黎嗰隻就一定係A,如果唔係A,就即係有人出老千,而事實上警官真係出老千,暗中換走咗隻A,無佢符之下惟有認輸。「Scarabs」玩法一模一樣,除咗骰盅移動速度得越來越快之外,仲隨時隨地加多隻唔同顏色嘅甲蟲,變成三個骰盅估兩隻唔同顏色嘅甲蟲,一啲都唔易玩架。我就玩到第十一關收皮,你呢?

iPhone下載:https://itunes.apple.com/hk/app/scarabs/id492663166?l=zh&mt=8&ls=1