fbpx
主頁, 動漫資訊, 潮玩新聞 — 25/10/2012 at 2:00 pm

完全版《群俠傳》卷二十,關七愛得瘋狂!

by

完全版《群俠傳》卷二十,$48。

元好問《摸魚兒》:「問世間情是何物,直教生死相許。天南地北雙飛客,老翅幾回寒暑。歡樂趣,離別苦。就中更有痴兒女。君應有語,渺萬里層雲,千山暮景,隻影為誰去?」唔係拋書包,睇完今期《群俠傳》,真係不禁問一句情為何物,直教關七呢個癡兒女自廢武功,弄得個隻影無碇去嘅悲慘下場。

關七係情癡中的情癡,對皇太后一往情深一心一意一見鍾情,可惜統統不過係一廂情願。今期寫佢得番半條人命都要硬闖皇宮,四大名捕護駕,關七使唔出破體無形劍氣,差啲俾班蛋散侍衛亂箭射死,最後得諸葛先生解圍先得以入宮,點知一入宮就俾皇太后鬧到狗血淋頭。我最Like第61至62頁,皇太后喪鬧再加兜班星嗰幾格,簡直拍案叫絕,司徒劍橋畫得實在抵死,將關七呢個狂莽自大嘅不世狂人,畫成一個好似俾老媽子打罵嘅頑皮仔,正宗鬧仔咁鬧,過癮!

皇太后表明心迹,講到明最怕關七一身好武功,之後兩人嘅對白又係好正──關七:「冤枉呀!我全為了你才立志變強的……換言之,若我失去武功,變回一個尋常人,就可以得到你的愛?」皇太后:「即使得不到我的愛,最少我會減輕對你的憎恨和害怕。」關七:「想不到我是這麼令你感到害怕,既然如此,我便把這一身討厭的武功廢掉吧!」講完粒爹都無,一掌自劈額頭真係廢功,一身功力盡散。唔係講笑,睇到呢度,我真係嘩一聲叫咗出黎,關七,你真係好型呀。