fbpx
Online Game, 主頁, 專題熱話, 遊戲新聞 — 20/10/2012 at 12:04 pm

藍星戰記Online PC爽似Metal Slug

by

 

台灣IGS嘅Game真係久違了!香港街機度除咗N年前嘅《三國戰紀》同《西遊釋厄傳》,到今日都係呢兩隻Game,估唔到!佢哋竟然搭上了香港Gameone,搞咗隻《藍星戰記 Online》,橫向卷軸雖然係佢強項,但全3D遊戲畫面,令我有啲驚訝,而且動作再唔似以前咁喪偷格,聽講Gameone喺遊戲開發方面俾咗唔少意見,打落仲有啲似Metal Slug(越南大戰)嗰種爽利感;你老闆吖,我街機餓咗咁耐,原來你走咗去PC Game度,24號開始公測,仲請嚟Super Gear十二個靚女做代言,收風話仲有一段遊戲短劇搵佢哋擔正,Download定等開Game啦!

httpvh://www.youtube.com/watch?v=xJeCqLnjMGE

呢架直升機,係咪熟口熟面呢?

 

畫面真係好大進步, 同日本廠開發有得揮!

每關關尾, 都有隻大Boss打, 好傳統棋向卷軸感覺。

 

支援多人對戰, 唔似街機玩咁孤獨精。

 

玩落勁似Metal Slug

雖然《藍星戰記 Online》,大家未有得玩!不過苦茶已經一早衝上Gameone總壇優先開打!一開Game,第一個感覺真係好Metal Slug,QQ畫風,表情低低哋嘅敵人,仲有好似玩具咁嘅直升機,玩法都類近,都係一排排過關,守關尾會有一隻大佬,打落相當快;哈!我真係估唔到係IGS同Gameone、港台兩邊搞出嚟!

一開Game,大家要先歸邊,W正義軍或X極惡聯盟!之後就要揀工種、作戰類型,暫時職業有5種,分別有槍擊系嘅「影槍姬」、「癒療使」、炸彈狂徒「戰略士」,同中近身拳頭交嘅「終結者」、「迅武者」,就暫試玩,近戰類單打比較着數,至於槍系就比較難控場,戰略士就比較特別,係技術類,打大佬會幾好用,不過打法近身,都幾講你連招反應!

 

 

唔使Chok 大招連技研究所

一般橫向Game,我都覺得有手掣會易玩啲,不過估唔到《藍》竟然用keyboard會更易玩!方法係用X、C、V三個鍵做前後走同跳躍,至於你見到出招極華麗嘅殊技,竟然係用A、S、D、F、G、Q、W、E、R十個掣就搞掂,簡單講,就係一按出「大招」,聽落好似幾膚淺,不過所謂嘅大招,又細分吹飛、範圍攻擊、集中攻擊、Long起、空中亂舞……所以玩法最大研究點,就係點用手頭招式,將大堆敵人集中一齊,再一招Long起、再集中打擊、最後將佢吹飛瞓低;當你以為一套套數可行時,但中級以上大佬又唔受你呢套,對連招嘅研究,真係有《拳皇》咁講究囉!

據知嚟緊仲可以養寵物, 不過收養之前, 要先俾佢打一鑊!

收咗靚之後, 可以玩人獸合一, 你睇! 幾靚仔!

最開心係用到佢啲技能, 相信係嚟緊好重要反敗為勝技能!

 

隱藏玩法優先睇

之前咪講有W同X兩邊聯盟嘅!遊戲除咗玩單人過排,仲有隊制闖關,估計嚟緊仲有隊制PK 0忝!台灣嗰邊暫所見,玩家都係一面倒用「終結者」,所以預見香港情況都會相當一樣;如果唔想以後組Team時搵工困難,我都係建議大家試玩「癒療使」,單挑過排真係超大鑊,但由於有幫隊友加血技能,估計中後段會相當吃香。

我仲偷睇到有其他玩法! 呢個係好以瑪利奧咁, 跳跳跳、跳障礙物過排!

 

呢個我鍾意, 生存模式, 仲要打十八銅人!頂!點解佢哋唔攞摺凳同水喉通嘅?

 

呢個叫追星模式, 要跳跳跳、儲星星!