fbpx
Mobile games, 主頁, 手機/電腦 — 18/10/2012 at 2:00 pm

免費手機新Game:校砲射殺喪屍

by

 

呢關叫做有啲危險,喪屍平排殺埋身,但唔使校角度,一砲一砲轟過去就得。

呢排好多喪屍Game,「Flaming Zombooka」畫面質素未必最好,但一定最好玩,淨係聽喪屍中槍嘅慘叫聲、肢離破碎嘅骨折肉裂聲、染到成地紅嘅噴血聲,已經過癮到震。我變態?認呀,射喪屍真係變態得黎好過癮架,哈哈。

理論上,呢個Game係永無Game over嘅,因為十關有九關,喪屍都係企到九里咁遠,喊打喊殺得個嗌字,永遠唔會殺到埋身。你呢?一樣唔郁得,武器只得迫擊砲一支,瞄準目標嗰陣,你要計算地形同埋砲彈拋物線,仲要善用各種有利自己的額外武器。舉個例,喪屍匿埋喺座山後面,你要向天空發彈,計埋砲彈嘅發射弧度同速度,先有機會命中目標;再舉例,山頂有個鐵球,你要射到個鐵球碌落山,務求一次過碌死晒山下面班喪屍。睇住喪屍俾自己殺到血肉模糊,嗰種快感真係非筆墨所能形容,哈哈哈哈……唔好話我變態啦,打機之嘛。

iPhone下載:https://itunes.apple.com/hk/app/flaming-zombooka/id498266246?l=zh&mt=8&ls=1

匿埋山後面?射後面兩個電箱,電死佢哋,得咗!

 

射中鐵球,一嘢碌死班喪屍,又得咗!